Nos muchanan a sa di duna un bunita y tremendo presentacion durante e anochi final di Festival del Talento y la Belleza Internacional 2022 (Agnes Universe). Annabell Bislip a logra e corona maximo den su categoria na unda su beyesa y su talento a resalta, y asina a wordo corona como Little Beautiful Universe 2022 na Agnes Universe. Tanique Chan cu a representa Aruba den e categoria di Miss Teen Model Universe a logra e titulo di Reina del Tropico y pronto lo figura den promocionnan di organizacionnan internacional y hopi otro oportunidadnan internacional a habri pa Tanique pa differente projectonan. Aruba keda pendiente pa projectonan grandi di cual Tanique lo representa Aruba. Thaheeli Geerman cu a representa Aruba den e categoria di Mini Modelo Universe 2022 a logra e titulo di primera finalista den su categoria, haciendo un tremendo trabow riba escenario y durante full e siman. Sigur hopi portanan lo habri pa Thaheeli tambe cu tin un tremendo talento y ta un mucha hopi carismatica. Maya Gordon cu a representa Aruba den e categoria di Pre-Teen Model Universe 2022 a sa di conquista e titulo di primera finalista. Maya a haci un tremendo presentacion riba e anochi final y tin hopi futuro su dilanti. Maya cu e experiencia internacional aki lo sa di tin un futuro grandi den e mundo di beyeza y modelahe, esaki ta djis e comienso pa Maya. Nos tin cu remarca cu tur nos modelonan ta prome biaha a participa den un evento asina aki y internacional, dus nos di The Chaz Modeling & Talent School ta sumamente orguyoso y contento cu e presentacion cu nos alumnonan a duna y na mayornan cu a duna hopi dedicacion na e muchanan. Nos kier a gradici tur hende y instancia cu di un of otro manera a juda cu e participacion di nos muchanan na Republica Dominicana. E no tabata un certamen facil pero nan a sa di representa Aruba dignamente, cu hopi orguyo y duna un tremendo presentacion internacional. Biba Aruba, Aruba Ariba!!!
