Diamars atardi, pa mas o menos 3:10 di atardi, Central di Polis a haya un yamada for di FACT Team di Respaldo solicitando asistencia di polis na un cas na Pos Abao. Segun informacion inicial, e pashent no tabata coopera cu e FACT Team, motibo pa cual a wordo pidi sosten adicional di polis y ambulance na e sitio.
Na yegada di patruya policial, e agentenan a topa cu e pashent di respaldo cu un machete den man, mustrando comportamiento hopi agresivo. Polis a intenta na varios ocasion di calma e situacion y a duna ordennan repetidamente pa cu e pashent pone e machete abao.
Sinembargo, e pashent no a sigui e ordennan di polis y, na un momento determina, a bay den direccion di un agente policial cu e machete. Mirando e serio peligro cu e situacion tabata representa pa e agente y otro personanan presente, e agente policial a wordo obliga di saca su arma reglamentario y a dispara, cu consecuancia fatal.
Inmediatamente a wordo pidi ambulancia cu maximo urgencia. Personal medico a yega na e sitio, a brinda atencion na e victima y a stabilis’é prome cu transportacion urgente pa hospital. Lamentablemente, un rato despues a wordo confirma cu e victima a fayece na hospital.
E fayecido ta un homber cu inicial nan F.M.H., naci na Aruba dia 30 di augustus 1989, di 36 aña di edad.
Autoridadnan concerni, incluyendo polis tecnico, departamento di slachtofferhulp y Landsrecherche, a presenta na e sitio di e incidente. E caso ta actualmente bao di investigacion pa Landsrecherche, considerando cu e incidente ta involucra un funcionario policial.
Cuerpo Policial Aruba a expresa su condolencia na famia y sernan kerí di e fayecido.