Un otro punto crucial y relevante cu parlamentario Eduard Pieters di fraccion di PPA a trece
dilanti, ta e situacion alarmante di nos hobennan profesional cu kier regresa Aruba. Cada bes
mas y mas e hobennan profesional aki ta acerca nos, incluso esunnan cu ta pensa pa bin bek
Aruba, cu e deseo sincero di forma un hogar y construi nan futuro aki. Pero hopi di nan ta topa
cu un muraya: un sistema di tereno y financiamento, cu no ta duna espacio pa nan drenta den e
mercado di bibienda.
E hobennan cu educacion, pero sin oportunidad
“Ta importante pa subraya cu nos no ta papia solamente di e hobennan sin formacion. Nos ta
papia di e hobennan cu HBO y Master, cu bon trabou y cu boluntad pa contribui na nos
economia. Sinembargo, ora nan bay banco pa solicita un prestamo pa compra of construi un
hogar, e contesta ta casi semper e mesun: e prijs di tereno y bibienda ta demasiado halto pa e
nivel di financiamento cu banco por aproba”. Resultado? E hobennan cu capacidad y ambicion,
pero sin posibilidad real pa drenta e mercado di bibienda.
Deficiencia di tereno y maneho transparente
E problema no ta solamente financiero. Tambe no tin tereno disponibel. Eduard a sigui elabora:
“Gobierno no ta sacando suficiente tereno pa e pueblo y en particular, pa nos hobennan. Esaki
ta un problema serio, specialmente ora Aruba ta sufriendo di ‘brain drain’ y nos, como pais,
mester ta enfoca riba ‘brain gain’. Un di e condicionnan basico pa logra esaki ta cla: acceso na
tereno pa forma un hogar”.
Falta di accion y responsabilidad
“Nos sa cu den pasado, ora POR tabata forma parti di gobierno, e ex-minister Otmar Oduber
encarga cu asunto di tereno a laga mas di 250 parcela cla pa entrega na Colony. Awe, e
pregunta ta legitimo: pakico e terenonan aki no por wordo saca? E argumento di investigacion y
caso pendiente no ta sostene mas. Awe no tin ningun caso andando, y cu sr. Haime Croes bek
den su funcion como director di DIP, e gobierno di AVP-FUTURO no por sigui uza esaki como
excusa,” Eduard a enfatisa.
Mientrastanto, e consecuencia ta duro y cruel: e hobennan cu kier bin Aruba pa contribui,
impulsa economia y aporta na caha di pensioen, ta optando pa bay bek otro pais, simplemente
paso nan por haya tereno y oportunidad laboral eynan. Esaki ta un perdida grandi y devastador
pa Aruba y un señal cla di falta di vision y accion.
Pa conclui Eduard a expresa cu ta profundamente tristo cu hopi di nos hobennan ta yega
desespera cerca dje y otro representante politico, paso nan no ta haya oido ni solucion for di
gobierno of e departamentonan competente. “Tin incluso hende cu ta wardando mas di 20 aña
pa un pida tereno y cu ta cay den henter un sistema burocratico. Anto pa completa, pa falta di
eficiencia di financiamento, nan no por yega na un tereno pa por traha nan cas,” Pieters a
señala. Regla y normanan ta necesario, pero nan mester ta transparente, husto y aplicabel di
manera consistente. Cada caso mester por ta evalua di manera individual, basa riba criterio
claro, cu ta conoci pa tur hende pero tambe pa tur instancia cu ta envolví den e proceso di
entrega tereno. Si Aruba kier tene su yiunan di tera y construi un futuro sostenibel, e asunto di
tereno no por keda mas na e ultimo pagina di agenda politico. Esaki ta un urgencia nacional!