Diahuebs 8 di december, boluntarionan na Biblioteca Nacional Aruba, hunto cu bibliotecaria Graciela Nedd-Cheng, a tene nan ultimo encuentro y tambe a celebra ‘Dia di Boluntario’ na ‘Coffee Aroma Aruba’. Esaki tabata un danki pa nan bunita trabou na hospital y alabes un despedida. Pa mas cu 20 aña, biblioteca tabatin un servicio special. A ofrece buki y revista na e pashentnan di Dr. H. Oduber Hospital, pa nan por lesa y distrai e mente un poco y pa pasa un rato placentero. Pa motibo di e renovacion y mudanza di hospital cu ainda ta andando y e pandemia, pa e ultimo 2 aña y mey biblioteca no por a brinda e servicio aki mas.
Biblioteca Nacional Aruba ta gradici tur e boluntarionan; Yolanda Wolter, Conny Peek, Sophie Semeleer, Emperatriz Perdomo, Rosalie Celaire, Marianne de Klerk, Frida Figaroa, Ingrid Paulina, Adelaida Ponson y Emma Croes cu tabata dispuesto pa dedica nan tempo y energia na e servicio pa e pashent. Masha masha danki!