Diaranson mainta durante un momento cu prensa, a haci uzo di e oportunidad pa invita e comunidad pa e accion di limpiesa Baki den Bario. Maikel Gomez, Vocero di BCI ta prome cu a hiba palabra pa asina informa di e localidad caminda e accion lo tuma luga e diasabra aki.
Centro di Bario Ayo lo bira e luga asigna e biaha aki caminda lo haci tur preparacion y acomodacion di e bakinan pa asina e comunidad por bin deposita nan desperdicio gratuitamente. Manera ta custuma, e lo ta riba un diasabra den ora tempran di mainta. Cuminsando for di 7:30 AM te 11:30 di mainta.
Tambe a informa riba ruta indica pa tuma, cual ta bira esun di Sero Pita tumando man drechi y asina yega Centro di Bario Ayo. Pa locual ta trata e desperdicio permiti, Gomez a indica cu tur cos ta keda den mesun forma cu tur otro, lo acepta sushi residencial y comercial, taira y azeta tambe ta desperdicio cu por trece durante e accion di Baki den Bario.
Miguel Wever, Coordinador di Baki den Bario pa Minister-President tambe a hiba palabra durante e conferencia di prensa caminda el a indica cu e accion di Baki den Bario ta un exito grandi rond nos isla. Diferente peticion drentando pa efectua e accion aki den cierto area, y ta coordinando cada biaha e esfuerso aki pa yega na mas localidad posibel.
Tur preparacion pa esun di diasabra awo na Centor di Bario Ayo a cuminsa, e logistica semper ta un parti importante di e accion aki, den man di DOW. Mester tene cuenta cu tin mester di un area amplio y cu bon coordinacion di entrada y salida pa e vehiculonan, como tambe e indicacion di unda cada desperdicio tin cu bay. Ta gradici semper Bureau City Inspector cu ta esun na cabes di e accion aki y cu ta haciendo un tremendo trabou.
Nececidad pa deshaci di desperdicio keto bay ta halto, a tuma nota cu porta un biaha e fluho di vehicolnan a baha un poco, pero mayoria di accion di Baki den Bario a mira un cantidad grandi y cu a aumenta mientras ta yegando e dianan di fiesta pa e temporada di fin di aña. Ta trata di aproximadamente 400 vehiculo of mas durante cada accion di Baki den Bario.
Pa finalisa a hiba palabra Jaclyn Agunbero, Coordinador di Accion den Bario pa Minister-President. Ademas di e accion di limpiesa, tin e accion di bario caminda cu Prome Minister acompaña pa diferente instancia y departamento ta drenta bario pa asina por scucha e pueblo y haya un bista directo di kico ta e nececidad mas urgente di cada bario.
E biaha aki lo toca turno e bario di Pos Chikito, caminda lo bishita e habitantenan, conhuntamente cu e departamentonan encarga cu limpiesa pa asina haci un esfuerso maximo pa recoge y duna man cu mantencion den e bario.
Ta gradici e pueblo cu e acogida di tanto e accion di Baki den Bario como esun di Accion den Bario, mirando e sosten grandi ricibi den cada bario. E comunidad ta duna di su banda pa mira nan bario y Aruba limpi y ta respalda cada accion cu tuma luga.
Press release: Gobierno di Aruba
