Centro di Bario Noord ta sigui cumpli cu su mision pa fortalece bienestar y union den nos comunidad cu e lansamento di un serie nobo di charla di informacion y educacion di salud, titula “BAN PAPIA SALUD.”
E iniciativa ta nace for di un deseo di empodera nos habitanten cu conocemento esencial tocante salud física, mental y emocional, y ta un parti importante di e compromiso di Centro di Bario Noord pa promove un estilo di bida saludabel y un comunidad mas fuerte.
E serie ta wordo facilita pa Dokter Aveline Figaroa, un profesional di salud cu hopi aña di experiencia den e area di medicina y bienestar. Durante e charla, Dokter Figaroa ta comparti informacion practico, orientacion util, y conseho basa riba evidencia científico pa yuda cuidadanonan di tur edad cuida miho di nan mes.
E prome sesion, cu a tuma luga den September, tabata titula “Fundacion Vital”, y a conta cu un asistencia positivo di varios habitanten di Noord y Aruba. E charla a cubri temanan manera e importancia di prevencion, movemento, alimentacion saludabel y maneho di stres — un base vital pa un bida saludabel.
Awo, Centro di Bario Noord ta invita tur hende pa participa den e di dos sesion di e serie “BAN PAPIA SALUD,” cu ta trata un tema sumamente importante pa bienestar di hende muhe: “Menopausa.”
Fecha: Diahuebs 23 di oktober 2025
Orario: 7:00 PM – 9:00 PM
Lugar: Centro di Bario Noord
Durante e sesion aki, Dokter Figaroa lo amplia riba e tema di menopausa — un etapa natural den bida di cada hende muhe. E lo splica con ta identifica e cambionan di e curpa y di mente, con pa maneha nan di forma natural, y con pa buska sosten medico y emocional durante e proceso aki.
E prome dos sesionnan ta solamente e comiensa di un serie mas amplo, cu lo inclui hopi topiconan relevante manera:
Salud mental y bienestar emocional
● Nutricion y actividad física
● Prevencion di malesa cronico
● Importancia di control preventivo
Centro di Bario Noord ta invita tur ciudadano — tanto homber como muhe, hoben y mayor — pakeda pendiente y sigui e serie aki cu regularmente lo sigui bira un plataforma di aprendizahe y union comunitario.
“BAN PAPIA SALUD” ta patronisa pa CEDE Aruba su iniciativa di “BarioUnico.” Pa mas informacion, contacto Centro di Bario Noord via tel. 568-2935, y sigui nos riba Facebook pa update di e proximo sesionnan. Hunto nos ta construi un comunidad mas fuerte, felis, y mas saludabel.
