Clyde van Putten miembro di Konseho Insular di Sint Eustatius ta aktualmente e polítiko mas popular di Sint Eustatius. E polítiko ku a i ta resistí kolonialismo hulandes ku alma i kurpa. Van Putten tabata na Kòrsou riba invitashon di Movementu Kousa Promé den kuadro di e siklo di formashon emansipatorio “Emansipashon”. E pregunta sentral ku Van Putten mester a kontestá durante su intervenshon den e siklo ta: Kiko a para ku Sint Eustatius despues di e gòlpi di estado brutal di Hulanda na 2018? El a splika na plaka chikí ku Statia no a bai niun tiki dilanti. Demokrasia a ser trapá i a keda trapá te awe pasobra te awe después di 4 aña ainda Hulanda no a entregá poder bèk na e Bestuurscollege i e Eilandsraad ku pueblo di Statia a eligí demokrátikamente. Ademas el a agregá ku durante e okupashon unilateral di Hulanda pobresa a bira mas grandi na Statia. Den e último elekshon na aña 2020 Van Putten su partido Progressive Labour Party a sali ganadó apsoluto miéntras ku e mes a sali e polítiko ku a haña mas tantu voto. E komo polítiko di Stasia lo keda perseverá den e lucha pa Stasia haña gobernashon propio.
Pa loke ta trata COHO Van Putten ta opiná ku si Kòrsou aseptá e lei aki di konsenso Kòrsou lo ta mort’i kachó. Gobièrnu i Parlamento lo pèrdè tur outoridat i mester entregá poder na Hulanda. Clyde van Putten ta trese dilanti ku paisnan den reino falta liderato firme pa para Hulanda. Pa e motibu aki Hulanda ta sigui humia gobernashon riba nos islanan i ta eksiguí pa gobièrnunan guli tur òrdu ku e duna manda bou.
