E expectactivanan ta hopi halto pa e di diez ‘Flip Flop Festival 2025’ cu lo tuma luga diasabra 7 di juni proximo den Harbor Arena Aruba.
Despues di un bon aceptacion di e prome tanda di artistanan, Cerbes Chill hunto cu Elite Empire Entertainment a confirma mas artista. Ta trata aki di e legendario artista Mr. Vegas. Vegas ta originalmente di Jamaica y ta wordo considera como un di e exponentenan mas grandi den e mundo di dancehall y reggeae. Pa mas di 20 aña e la sa di mantene su mes relevante y actualmente e tin un cancion cu a bay viral riba TikTok yama ‘Hot Wuk’. Otro exitonan conoci ta ‘Heads High’, ‘She’s a ho’, ‘Tek weh yuself, ’I am Blessed’y hopi mas. Mr Vegas sigur lo sa di domina e escenario na un forma hopi energetico.
Otro artista nobo confirma ta ‘Rafik’. E artista aki a nace na Corsou pero tin raiznan na ‘Colombia y Libanon’. E ta firma bou di e label KJ74 Entertainment di e conocido pelotero Kenley Jansen. Rafik ta presenta un fusion di ritmo cu e publico den su totalidad lo bay goza di dje. Rafik y su ekipo ta trahando caba riba un presentacion unico cu hopi coreografia y sorpresa.
Adicionalmente e anuncia tambe cu ‘A Touch of Steel’ featuring Dj SKY tambe lo ta formando parti di e artistanan cu lo presenta e anochi aki. Durante e ultimo lunanan por a nota un aprecio masha special pa e formato nobo aki unda cu e musiconan di Steel Pan ta wordo reforsa cu otro instrumento-, cantante- y tambe Djnan. Nan lo prepara un repertorio special pa e anochi aki.
Combersando cu e ekipo tras di e evento aki, por compronde cu e benta di ticket den su pre-benta ta un nivel nunca bisto na Aruba. Faltando un luna pa e evento y pa ta na e nivel di benta aki sigur ta mustra cu e di diez edicion di Flip Flop lo kibra tur record di pasado. Pa loke ta e mesanan di VIP esakinan a ‘sold out’ for di siman pasa. E seccion di ‘Standing VIP’ tambe ta bon bendi y ta premira cu esaki lo ‘sold out’ e siman aki.
Importante pa menciona cu pa cu e evento aki ta permiti entrada di nos hobennan riba 12 aña di edad. Esnan entre 12 cu 17 mester ta acompaña pa un adulto.
E otro atraccionan pa e anochi aki ta Beéle for di Colombia, Blaka Dan, Young Bredda, DJ BB Bad, Tsunami, Groove Masters, Touch of Steel, Dj Sky, Dj Whiteboy, Dj Yeimy y pronto algun sorpresa mas pa e di dos stage durante Flip Flop Festival.
Ticketnan ta disponibel na Citgo Boulevard, Citgo Essoville, Pay.aw y www.eliteempire.events. Na Corsou tambe tin un demanda pa tickets y por cumpra ticket na Ticketpoint Curaçao, situa na Zeelandia.
Flip Flop Festival ta presenta pa: Cerbes Chill, CMB, Aruba Airport Authority, Coca-Cola, Sprite, Bacardi, Dewar’s, Dussé, Schweppes, Elite Empire, Elite Productions y Rayo.
