Prome Minister di Corsou Gilmar “Pik” Pisas a declara dialuna cu e isla ta “neutral y lo keda mantene su neutralidad” den medio di e tension cu a aumenta entre Estadonan Uni y e pais bisiña Venezuela. El a haci esaki durante un conferencia di prensa. E presidente Mericano Donald Trump a anuncia siman pasa, cu e lo manda tres buque di guera pa Venezuela pa lucha contra trafico di droga y ataca terorismo. E pais surmerikano ta considera esaki como un acto di agresion.
Presidente Nicolas Maduro a manda yama tur militar y milicianonan (civil) pa arma nan mes pa defende e pais contra Merca. Corsou ta situa 65 kilometer for di Venezuela. Diahuebs un di e tres
buquenan Mericano (USS Jason Dunham) lo atraca den haf di Willemstad pa yena combustibel. Hopi habitante di Corsou tin miedo cu e relacion cerca cu Merca por provoca reaccion di Venezuela. Pisas ta reconoce e preocupacion aki.
“Na e momento aki no tin motibo pa bay den panico,” segun e premier. “Nos ta neutral.” Pisas ta spera cu Venezuela kisas lo cera completo su fronteranan, y tambe tin e posibilidad cu pa motibo di e tension aumenta mas Venezolano lo huy pa Corsou. E no ta spera cu Estadonan Uni lo ataca Venezuela. “Ta bon pa considera cu Merca tin problema cu e presidente, Nicolas Maduro,” Pisas ta agrega. “Nan ta akus’é di involmento de bandanan criminal y trafico di droga. Nan ( e Mericanonan) no tin problema cu e pueblo di Venezuela.”
Pisas ta enfatisa mas leu cu tur contacto oficial cu Estadonan Uni ta pasa via Den Haag, no via Willemstad. Pero cu e informacion for di Washington tocante e accion “ta hopi scars.”