Awe marduga Wardakosta a señalá un kontakto sospechoso den serkania di Kòrsou. Despues di a detektá e boto sospechoso, e Sentro Marítimo Operashonal di Wardakosta a dirigí un unidat di Metal Shark i e helikòpter den direkshon di e boto sospechoso pa opservá esaki.
Una bes ku e helikòpter di Wardakosta a yega na e sitio, e tripulashon di e helikòpter a mira e boto na St. Jorisbaai. E boto sospechoso a ser laga atras den e mondi di mangrove nan di St. Jorisbaai.
E dos personan ku tabata na bordo a huí drenta den e mondi di mangrove lagando e boto patras. Durante kontrol riba e boto Wardakosta i Polis a haña mas ku 770 kilo di droga riba e boto. A haña tambe 7 arma di kandela i munishon na bordo. E droga, armanan i munishon a ser entregá na Kuerpo Polisial di Kòrsou i e droga entretantu a ser destruí.