Den e periodo binidero ta mehora recogemento di sushi na Boneiro cu binida di cuater truck di sushi nobo pa Selibon. A mehora e orden di e vehiculonan y segun expectativa nan ta keda entrega fin di oktober 2026. E trucknan nobo ta forma un paso importante den mehoracion structural di recogemento di sushi na Boneiro.
Diputado Dennis Martinus: “Cu e cuater trucknan di sushi aki nos por sigui mehora recogemento di sushi na Boneiro. Den e periodo tras di lomba ya caba a pone diferente paso pa stabilisa e situacion na Selibon. Nos ta sigui traha riba esaki hunto cu Selibon, di manera cu nos habitantenan por conta cu recogemento di sushi na un manera addecuá y confiabel.”
Medida di emergencia pa stabilisa e situacion na Selibon
Den luna di februari ya caba a cumpra dos truck pa por atende cu e problemanan di capacidad di recogemento. A inverti tambe den otro ekipo cu ta core, piesa di reserva, y sosten pa mantencion di e flota di vehiculo. E inversion den e trucknan di sushi ta forma parti di un paquete mas grandi di medida di emergencia cu for di luna di april Colegio Ehecutivo a bini cune como parti di e ‘last onder bestuursdwang’ pa stabilisa e situacion na Selibon y na landfill Lagun. Durante e ehecucion Colegio Ehecutivo a pone medionan adicional disponibel caminda esaki tabata necesario.
Aparte di e trucknan di sushi a inverti tambe den ekipo pisa, entre otro un ‘wheel loader’, un dumptruck, un ‘landfill compactor’ y un catapilar. Ya caba nan a entrega e ‘wheel loader’. Segun expectativa nan ta entrega e otro mashinnan den luna di oktober. Entidad Publico Boneiro a pone medionan disponibel tambe pa limpiesa di e almacenamento di tayer, pa un sistema nobo di traha na landfill y pa mehoracion di e posicion financiero y operacional di Selibon.
Entretanto resultado di e medidanan ta visibel caba. E molestia directo pa e vecindario, entre otro riesgo pa candela, plaga y holo stinki, a bira menos.
Futuro di recogemento di sushi na Boneiro
Actualmente un investigacion ta andando pa scohe e miho sitio pa realisa un centro nobo di transbordo y separacion multifuncional. Awor cu gran parti di e medidanan di emergencia ta finalisa, e atencion ta bay mas y mas riba un manejo di sushi structural y duradero pa futuro di Boneiro.
