Mi ta mira “Papa Dania”, “Pai” sinta den Bibliotheek
Banda di su bunita yui muhe, cu su atencion ta companje y cuid’e
Ta goza di otro programa bunita y interesante guia pa Mirto Lacle
“Papa Dania” cu a yega na e bunita edad di 102 primavera
Un miembro soldaat di Camarada, Schutterij den tempo di guerra
Mi ta mira “Papa Dania”, “Pai” sinta den su stoel den veranda
Dia cu ela cumpli su di 100 anja, cu bishita di bisinjanan y Dakoteronan di tur banda
Nos tambe a bai pa felicitele cu e bunita logro di un siglo na bida
Ta masha hopi anja mes cu ela goza di nan trankilmente y a stima
Su yuinan, nieta y nietonan, awor “Pai” uni bek cu su bunita sra esposa Regina
Jose Maria Dania, un shon di hende cu a biba den lus y claridad inspira
Un homber fuerte cu a defende Aruba cu su balente fe sin vacila
Un di nos dushi hendenan di nos dushi bario di Dakota tur dia
Un persona cu ariba su cara su mesun dushi paz y alegria
Awor den brasa di su Creador di Amor Infinito lo sigui briya
Danki “Papa Dania”, danki “Pai” Danki Jose Maria Dania
Bo a duna y comparti di bo talentonan y bo forsa cu ba hanja
Den bo bon trabaonan, bo bon ehempelnan, bo sinceridad y honestidad
Bo edad cu a sigui subi, ba gana Padu Lampe cu a yega casi 100
“Papa Dania” a hanja bonus extra di 2 anja ariba e edad di 100
Dakota no lo ta e mesun Dakota sin su habitante di mas grandi
Pero Dakota lo sa di recorda e shon di hende aki, semper padilanti
Dakota ta di luto, nos curason ta herida, parti na dos
Pero ta accepta y conforma su mes cu “Pai” ta serca Dios
Den amor, den paz, den lus eterno, cu gradicimento na Dios pa tur cos .
Autor : Ruthy”Lady Ruth” Vrieswijk-Bergen
Den nomber di famia Bergen di Patiastraat, famia Tromp di Rondweg
y demas famianan di nos dushi bario di Dakota tur dia mucho hopi pa menciona !