Datonan di e Departamento di Epidemiologia na Aruba ta mustra cu for di 1 di juli 2021, di cada 10.000 persona no vacuna, 16 a fayece.
ORANJESTAD, Aruba –20 september 2021: For di cuminsamento di juli 2021 cu e variante Delta a haci su entrada na Aruba, hopi lihe e variante aki a causa preocupacion ora ela plama causando un brote grandi di casonan di COVID-19.
E variante Delta a wordo categorisa como un variante mas contagioso compara cu otro variantenan y esaki nos por a experencia tambe na Aruba ora di haci comparacion cu e brotenan anterior di COVID-19.
Te cu dia 12 di september 2021, nos tin na Aruba un total di 70.105 (75%) asegurado di AZV riba 12 aña cu si a vacuna y 23.668 (25%) asegurado di AZV cu no a vacuna.
E informacion aki ta hopi importante pa analisa: di e 70.105 (75%) cu si a vacuna, 8 persona a fayece relaciona cu COVID; y di 23.668 (25%) cu no a vacuna, 39 persona a fayece for di cuminsamento di juli te cu dia 12 di september.
Si nos recapitula tur data for di 1 juli 2021 te cu 12 di september 2021, nos por conclui cu pa cada 10.000 cuidadano cu no a vacuna, 16 a fayece relaciona cu COVID-19; y pa cada 10.000 cuidadano cu si a vacuna, 1 persona a fayece relaciona cu COVID.
E analisis aki ta basa riba cifranan di asegurado di AZV. Motibo cu ta uza cifranan di AZV pa e analisis aki ta pa motibo cu e cifranan registra ta logra un analisis cu un resultado real y confiabel. E cifranan aki no ta inclui hende indocumenta of studiante di afo cu a vacuna of cu por vacuna ya cu aki no tin exactitud y e medicion lo bira un calculacion proyecta.
Pa medio di analisis continuo, DVG ta sigui evalua y dirigi su maneho di vacunacion cu ta demostrando di ta hopi efectivo den scapa bida di nos cuidadanonan.