Directora di Gabinete di Aruba Joselin Croes LL.M/M.Sc a asisti riba invitacion e “Public Forum” di NATO cu a tuma lugar na Stadhuis di Den Haag. Tambe presenta tabata Minister Plenipotenciario di Sint Maarten mr. Gracita Arrindell.
Durante e evento Joselin Croes tabata tin e oportunidad pa topa y papia cu hopi persona, entre nan e burgemeester di Den Haag Jan van Zanen.
E “Public Forum” di NATO tin como meta pa stimula un mihor comprendemento cerca e publico general riba e maneho y metanan di NATO y riba e desicionnan cu lo wordo tuma na e cumbre e siman aki na Den Haag. Esaki ta sosode pa medio di dialogo cu un grupo di persona diverso y unico: hefenan di gobierno, ministernan, expertonan riba tereno di seguridad, academiconan, periodista y hobennan. Tur esaki ta tuma lugar den un serie di discussionan, debatenan y seccionnan interactivo riba diferente tema cu ta riba agenda di e cumbre di NATO.
