Esaki ta posibel danki na e espacio financiero cu Gabinete Wever-Croes a crea.
Gobierno di Aruba hunto cu DOW pa trata e Plan 2025 pa asfalta careteranan na Aruba.
Prome Minister Evelyn Wever-Croes a habri e conferencia elaborando en corto riba
acontecimentonan importante di e siman cu a pasa y indicando riba e situacion financiero cu
Aruba ta pasando aden cu a conduci cu por sigui asfalta y mantene careteranan na Aruba.
Siman pasa, Prome Minister a atende diferente tema financiero y a presenta plannan y
cuadronan financiero. Riba esaki por a scucha reaccion positivo di Hulanda por ehempel e
carta cu Secretario di Estado Zsolt Szabó a manda pa Tweede Kamer fin di siman pasa, cu ta
indica cu e tin tur confiansa cu Aruba lo cumpli cu su metanan financiero. Riba e atrasonan di
e jaarrekening, Secretario di Estado a splica cu Aruba ta trahando na bon manera pa elimina
esakinan y si tur cos bay segun plan esakinan lo wordo elimina. No obstante, e elogio mas
grandi di Secretario di Estado Szabó ta keda e bon maneho financiero di Aruba.
Tambe Prome Minister ta indica cu siman pasa CAft tawata na Aruba y a reuni cu Gobierno y
a duna hopi elogio pa loke ta trata finansas di Aruba. Dos preocupacion cu nan tin ta e
jaarrekening pero nan ta satisfecho di mira cu e trabou ta andando pa elimina e atraso riba
esaki. E otro preocupacion ta e Presupuesto 2025 cu no a wordo trata ainda y pa esey CAft lo
bay pidi atencion urgente na Presidente di Parlamento pa trata e presupuesto mas pronto cu ta
posibel.
Prome Minister:
“Aparte di e preocupacionnan aki, mas nos por a scucha hopi elogio. Y e elogionan aki no a
cay for di shelo of a bin den un siman, nan ta elogionan di trabounan cu nos ta bin ta haciendo
durante e ultimo 7 añanan, specialmente despues di e crisis di e pandemia. Nos a traha tur e
tempo cu un cuadro financiero, pa motibo cu esey ta e unico forma cu e inversionnan cu ta
necesario den nos pais, wordo haci. Por ehempel den e caso di DOW, nos tin espacio
financiero pa por inverti den e proyectonan cu ta den pipeline na e momento aki”.