Featured Social

Durante luna di Oktober FAVI ta concientisa trafico di e uzo di e GAROTI BLANCO cu strepi cora


Tur aña FAVI ta para keto y ta pone atencion riba dia internacional di garoti blanco cu strepi cora. Ta importante pa e cliente di FAVI sa con pa uza su garoti blanco den trafico, pero tambe pa automobilista y ciclistanan sa con e cliente ta uze. FAVI ta consciente cu su uzo den trafico ta poco y ta pesey mes ta importante pa keda concientisa. Durante 2020 FAVI a organisa entre otro caminata, paseonan entre otro na Linear Park, Avenida Watty Voz y tambe Palm Beach. Meta di esaki tabata pa keda practica e bon uzo di e garoti blanco strepi cora y tambe duna nos clientenan tipsnan practico con pa mobilisa cu seguridad den e pandemia di COVID-19. Kisas den 2020 comunidad no lo mira nos accion den grupo grandi, pero si individual y rond di nos isla. Ta pesey nos kier keda cu e mensahe di tur aña : Si bo mira un persona ta cana cu un garoti blanco strepi cora den trafico, baha velocidad y si e kier crusa caminda, para y bise cruza numa. Den e pandemia aki FAVI a keda activo y a duna charla na scolnan y grupo di interes. Nos ta habri di dialuna pa diabierna di 8 :00 pa 5 :00 pm. . Mundialmente e garoti ta conoce cambionan tambe. Por ehempel e color geel ta wordo añadi na garoti pa persona nan cu ta biba den cuidadnan hopi congestiona. Tambe muchanan por cambia e color pero mantene e reflectornan cora y blanco na e garoti. Esey ta nifica cu comunidad lo por topa clientenan di FAVI cu garoti blanco cu rose, blanco cu blauw y hasta geel.

Abo conoce e garoti blanco ?

Un garoti blanco ta un medio auxiliar pa un persona cu tin limitacion di bista of un persona cu ta ciego. E ta un medio di indentificacion tambe. Si bo mira un persona cu e garoti esey kiermen cu e persona aki tin un problema pa mira.

Un persona visualmente incapacita ta usa e garoti pa 2 motibo importante:

  1. Pa hala atencion di otro peaton y esnan participando na trafico, cu e persona en cuestion no ta mira bon of ta ciego. Ta usa e garoti di guia specialmente ora di crusa caya y tambe pa mobilisa su mes por ehempel rond di cas, den supermercado of den caya.
  2. Pa orienta den su mesun ambiente, pa localisa puntonan di orientacion y pa nota obstaculonan na tempo.

Na momento cu un automobilista, ciclista etc. mira un persona cu e garoti blanco strepi cora cu ta indica cu e kier crusa, e mester cuminsa baha velocidad y dunanan e oportunidad pa haci esaki.

 Con un usuario di e garoti blanco ta indica cu e kier crusa ?

E usuario di e garoti ta indica cu e kier crusa door di hisa su garoti stret su dilanti, ora ela jega na e zebrapad of caminda cu e ta bai crusa. Despues e ta scucha si e auto a stop y den aproximadamente 2 seconde e ta cuminsa na crusa e caminda. Ora cu e jega mei-mei di e caminda e ta baha e garoti y ta fula pa e trotoir. Ora e automobilista mira un persona cu ta bay crusa cu su garoti, e por zona un pito suave pa asina duna e persona e señal cu e por cruza.

Con e guia di FAVI ta sosode ?

E terapista di revalidacion ta duna instruccion  na e cliente con e uso di garoti mester sosode. Esaki por ta den e  vecindario cu e cliente conoce y tambe na lugarnan desconoci pa e cliente. Despues cu e cliente ta domina e canamento cu e garoti e ta bai ariba caminda publico cu ne. E cliente ta siña usa su oido bon y ta siña interpreta kico ta e direccionnan pariba y pabao, crusa caminda etc.

Na Aruba sinembargo hopi cliente tin miedo di haci uso di careteranan. Un di e motibonan principal di esaki ta e trafico insigur. Cu e cambionan di infracsturcutura den diferente bario ta haci e ora cu nos di FAVI kier experiencia e ruta nan nobo hunto cu e cliente.

FAVI ta compronde e miedo di su clientenan pa cana riba caya y pesey ta haci un suplica na comunidad pa tene cuenta cu esaki. FAVI lo keda concientisa nos comunidad y keda stimula nos clientenan pa haci uso di e garoti blanco strepi cora ariba caya y tambe den nan ambiente social.

Related posts

Di acuerdo cu aruba tourism authority: turismo ta sigui progresa gradualmente

EA News Author

A ricibi placa pa cumpli cu pago di dunadonan di cuido

EA News Author

Pronóstiko di tempu pa Kòrsou

EA News Author

Leave a Comment