Na 1776, Fort Oranje a contesta e saludo di e bapor Mericano
Andrew Doria. Cu esey, Statia a bira parti di e historia di independencia Mericano. E aña aki, riba
Statia Day, e isla a conmemora 250 aña di First Salute. E Comite di Conmemoracion Pasado di
Sclavitud a contribui na e programa di Statia Week. Su meta ta pa conmemora e pasado di
sclavitud, uni e comunidadnan den Reino cu otro y pasa e historia aki pa e generacionnan mas
jong.
Riba cada un di e seis islanan Caribense y na Hulanda, e pasado di sclavitud ta sigui tin su efecto na su
propio manera. Statia Day y e actividadnan pa bai topa e dia ta duna espacio pa para keto na e
historia ey. Nan ta duna espacio tambe pa honra e hendenan cu a biba den sclavitud y cu a resisti
contra esaki. E Comite a contribui financieramente na e entiero dinobo di e 69 antepasadonan di
Golden Rock y a yuda partnernan local cu e preparacionnan. Durante Statia Week, otro proyectonan
di e Comite tambe ta haya atencion, for di marcacion na santananan te un exposicion permanente cu
ta reuni e historia di e seis islanan Caribense. Ta sali un buki pa mucha tocante e revolucion di 1848.
Ta revela un mural na honor di Thomas Dupersoy, y na Statia e prome porta chikito di Anansi ta
habri.
Un lugar di sosiego digno pa e antepasadonan di Golden Rock
Riba 13 di november, e antepasadonan di Golden Rock a haya nan ultimo lugar di sosiego na Statia.
Na 2021, durante e expansion di aeropuerto F.D. Roosevelt, a haya e restonan di 69 hende cu nan a
sclavisa den un santana den plantashi di siglo diesocho. Descendientenan cu nan derechonan a insisti
riba un entiero dinobo digno y tambe riba voz den e decisionnan tocante investigacion di e restonan
di nan antepasadonan. Cinco aña despues di e hayazgo, descendientenan, famianan y otro
habitantenan a ser invita na e conmemoracion publico, pa hunto para keto na e bida di e
antepasadonan y nan lugar den e historia di Statia.
Diabierna mainta a entrega e cahanan oficialmente. Despues, un procesion solemn a pasa door di
cayanan dorna cu cora y blanco. E ruta a pasa pa varios sitio historico, entre nan e anterior plantashi
Golden Rock, y a termina na e santana nobo na Princess Estate, patras di Old Church Cemetery.
Musica tradicional a acompaña e re-entiero. A lesa nombernan di e antepasadonan na bos halto, y
esnan presente a haci momentonan di silencio y reflexion.
Segun Paulo Martina, director general di e organisacion di trabou di e Comite di Conmemoracion
Pasado di Sclavitud: “E antepasadonan aki tabata parti di un comunidad cu su historia ta sigui biba
na Statia. Durante nan bida, a kita nan Libertad for di nan. Cu e entiero dinobo aki, nan ta haya un
lugar di sosiego digno y e comunidad por conmemora nan cu honor. P’esey e Comite di
Conmemoracion ta haya cu ta importante pa sostene e comunidad di descendientenan y e
partnernan local ora di hiba e antepasadonan bek na nan ultimo lugar di sosiego”.
Statia Cultural Heritage Implementation Committee y St. Eustatius Afrikan Burial Ground Alliance a
organisa e ceremonia hunto cu partnernan local. Comite di Conmemoracion Pasado di Sclavitud a
contribui cu 50.000 dollar Mericano na e entiero entiero dinobo aki y hunto cu Alliance y e gobierno
insular a yuda tambe cu e preparacionnan.
Sitionan pa conmemora, storianan pa sigui conta otronan
Riba 14 di november, na Fort Amsterdam, a revela cuater marcacion na santananan di hende cu nan
a sclavisa. Nan ta parti di un serie di diescinco cu e Comite a financia na Statia. E marcacionnan ta
haci e santananan reconocibel como lugar di conmemoracion. Via un codigo QR, habitantenan y
bishitantenan por siña mas tocante e historia di cada sitio.
E mesun dia, na oficina di e Comite na Statia, a tene e presentacion di e buki pa mucha Courage on
Golden Rock. Autor Joselyne Arnell y ilustrador Milkaya Laijah ta conta e historia di Thomas Dupersoy
y e comunidad cu a lanta contra sclavitud riba 12 di juni 1848. Tur hoben na Statia ta ricibi un
exemplar. E buki lo ta disponibel tambe den bibliotecanan den henter Reino. Un dia despues, e
historia di Dupersoy ta haya un lugar den e cayanan di Statia cu revelacion di un mural di e artista
Jhomar Loaiza. E Comite a tuma e iniciativa pa e mural y a financi’e completamente.
Portanan chikito. Storianan grandi.
Durante Statia Week, e isla ta revela e prome porta chikito di The Doors of Anansi, un proyecto di e
Comite di Conmemoracion Pasado di Sclavitud pa henter Reino. Esun cu habri e porta chikito y scan e
codigo QR ta tende e truconan sabi di Anansi. E cuentanan ta conta den un idioma local, door di un
voz cu e oyentenan kisas lo reconoce. Den e lunanan cu ta bini, mas porta chikito ta sigui. Tin sesenta
planea riba e seis islanan Caribense y otro sesenta na Hulanda, cada un cu su mes diseño y historia.
E Comite a scoge Anansi pasobra su cuentanan ta pasa di generacion pa generacion riba tur seis isla.
Cada isla tin su mes versionnan, y cada generacion ta wak su truconan di un otro manera.
E historia di seis isla ta bini hunto
Riba 12 di november, e antiguo kruitmagazijn banda di e museo na Fort Oranje tambe a habri como
espacio di exposicion. E exposicion ta conta di e hendenan cu nan a sclavisa cu mester a transporta
kruit y cu a core riesgo di candela y explosion. Na 1721, un ordenansa local a obliga hende cu nan a
sclavisa pa yuda cu e restauracion di e fort. Na e mesun lugar caminda Statia ta conmemora e First
Salute, bishitantenan ta mira tambe con e defensa di e isla tabata depende di trabou forza.
Den e Fort Oranje Museum nobo, e perspectiva di e hendenan cu nan a sclavisa ta central den e
storia di Statia. E Comite di Conmemoracion Pasado di Sclavitud a financia e piso abao, caminda un
exposicion permanente ta reuni e historia di sclavitud di e seis islanan Caribense. Asina e historia ey
ta haya un lugar permanente na Statia. Bishitantenan for di Aruba, Boneiro, Corsou, Saba y Sint
Maarten por descubri einan kico e historia di nan propio isla tin den comun cu esun di Statia y con e
experiencianan tabata diferente pa cada isla. E museo a habri oficialmente riba 16 di november,
Statia Day.
E Comite ta hiba e conmemoracion mas leu
Paulo Martina, director general di e organisacion di trabou di e Comite di Conmemoracion Pasado di
Sclavitud y presidente Astrid Elburg, hunto cu diferente miembro di directive y empleadonan di e
organisacion di trabou, a asisti na e actividadnan na Sint Eustatius.
E Comite di Conmemoracion Pasado di Sclavitud ta orguyoso di por a honra e antepasadonan hunto
cu e habitantenan di Statia y di comparti e historia di e isla cu resto di Reino. E Comite ta traha pa
Statia haya e reconocimento cu e merece y pa e pasado di sclavitud haya un lugar permanente den e
conmemoracionnan publico den henter Reino.





