Durante e siman cu a pasa, Filomena College MAVO (FCM) a dedica un siman special pa gradici y balora e esfuerso di su cuerpo docente y personal administrativo. Bou di e nomber ‘Teachers Appreciation Week’, e scol a percura pa varios sorpresa diario como simbolo di gratitud pa e dedicasion brinda na e educacion di e alumnonan.
E iniciativa aki, cu a keda bou di guia di juffrouw Judesca Holsman, a transforma e sala di maestro (lerarenkamer) den un ambiente di fiesta y aprecio. Cada dia, e mesa central tabata wordo dorna cu diferente producto, obsequio y detayenan special pa cada miembro di e ekipo di FCM.
Reconocimento na e labor educativo
Directorado di Filomena College MAVO a enfatisa e importancia di e tipo di actonan aki pa motiva e personal cu ta traha incansablemente pa e futuro di e hubentud na San Nicolas. E aprecio aki no solamente ta bay pa e maestronan den klas, sino pa tur miembro di personal cu ta contribui na e funcionamento diario di e instituto.
Sosten di comercio local
E exito di e siman aki tabata posible danki na e bunita gesto y colaboracion di varios compania y fundacion cu a uni pa duna nan granito di raba. Filomena College MAVO ta extende un danki inmenso na:
- Martijn Trading
- Fundacion MiJu
- Subway
- TEC Inc Aruba
- Swift Distribution
- Pelican Adventures
- Sublicious Aruba
Un mencion special a bay pa Tiny Spoons by Youth House Montessori, kendenan a deleita e personal cu nan dushi bebidanan tanto cayente como friu durante e celebracion.
Cu e tipo di inisiativanan aki, FCM ta reafirma su compromiso no solamente cu e excelencia academico, sino tambe cu e bienestar y reconocimento di esnan cu ta forma e curason di e scol.
