Aña 2020 ta jegando su final. Un aña cu a cambia e systema di biba na henter mundo. Un aña cu hopi famianan na Aruba a pasa den dificultad. Un aña cu economia di nos pais a sufri masha hopi. Un aña cu retonan grandi riba tereno di salud. Un aña cu retonan grandi riba e tereno social. Un aña cu mester pone nos refleciona como ser humano preparando nos mes mentalmente pa enfrenta 2021 cu un caracter positivo. Fraccion di MEP por mira atras apesar di tur cos riba un aña di trabounan eherse di gran balor agrega pa Parlamento y Aruba. Esaki debi cu Parlamento a logra duna su contribucion na e mihor manera posibel pa juda Aruba traspasa door di e crisis aki manteniendo e ser humano central. Asina Fraccion di MEP a vota na fabor di presupuesto 2020 cual a brinda e oportunidad na fondonan nesesario pa sostene entreotro 37.000 mama y tata di famia cu tabata coriendo peliger pa perde nan trabou. Igualmente a brinda sosten na e proyecto di FASE pa asina mantene 4000 famia cu un entrada. Tambe a sostene e programa di MKB steun pa brinda comerciantenan un ayudo. Banda di esaki a percura pa sostene y pasa leynan importante manera di Ombudsman y Financiamento di partidonan politico pa nombra algun. Reflecionando y recapitulando aña 2020 sigur esaki no tabata uno facil. Banda di e Pandemia mester a deal cu un precion imenso di Hulanda den e momentonan critico di pais Aruba. Laga nos jama aña 2020 ayo. Aña 2020 lo keda graba den historia di nos pais. Laga nos jama aña 2021 un bon bini. Fraccion di MEP ta desea henter pueblo di Aruba un Feliz y Prospero aña 2021. Happy New Year Aruba! Cu Papa Dios sigui guia nos den e proceso pa sirbi comunidad den e mihor forma posibel.
