Durante reunion pa aprobashon kuenta anual 2019
Parlamento dia 17 di yüni 2025 a duna inisio na un reunion públiko pa por trata aprobashon dje kuenta anual di 2019. Ta trata di un kuenta anual kual entre otro Kontraloria General tabatin su opheshonnan, mientras SOAB a apstené di duna un konseho riba dje.
Durante último kuater añanan frakshon di MFK a bin ta sigui e desaroyonan rondó dje maneho finansiero di país hopi djaserka. Aktualmente e miembronan ku ta representá frakshon di MFK den e komishon fiho di finansa ta señores Ishahier Monte, Juniël Carolina, Tyron Boekhoudt komo vise presidente i Ramón Yung komo presidente. Miembronan dje komishon fiho sigur lo kontinuá ku e trabounan desplegá durante e último kuater añanan, esta di salbaguardiá interes di país i sóru pa e maneho finansiero ta reflehá progreso i stabilidat finansiero.
Kontraloria General den su rapòrt a indiká ku nan no por a aprobá e kuenta anual di 2019, teniendo kuenta ku e kuenta anual no ta kumpli ku e reglanan preskribí den e lèi di kontabilidat i un bon maneho finansiero.
Segun kontraloria general, e sifranan den e kuenta anual ta indiká ku a surpasá e presupuesto ku 178,1 mion. E suma aki ta konsistí di 97,3 mion ku a surpasá na gastu, mientras ku a risibí 80,8 mion ménos na entrada.
Presupuesto di país ta algu serio i ku Parlamento sigur mester kuida di forma sagrado. P’e motibu aki mes, frakshon di MFK ta kontentu i ta aprobá e maneho ku Minister Javier Silvania a bin ta hiba durante último 4 añanan. E maneho di Minister Silvania ta dunando su frutanan, pasó apesar ku a premirá un défisit di kasi 141 mion den aña 2022, Minister Silvania a bòltu e direkshon ku kosnan tabata baiendo, pa finalmente aña 2022 a sera ku un saldo positivo. Igualmente tabata e kaso pa añanan 2023 i tambe 2024 ku a sera ku un saldo positivo i segun indikashon di CFT, aña 2025 tambe lo sera ku un saldo positivo.
CFT den su konseho a indiká ku den yanüari 2025 a paga bashí premi, pero ku esaki no tabata presupuestá, ni no a manda esaki pa aprobashon na Parlamento. Tabatin remarke den komunidat riba esaki, pero apesar ku e bashí premi no tabata riba presupuesto di 2025, tin tur indikashon ku 2025 lo sera ku un saldo positivo.
Frakshon di MFK alabes a tuma nota dje reakshon di Minister Silvania, den kual el a indiká ku na momento ku terminá ku e negosashonnan pa re-finanshamentu dje debe di 140 mion i ku yega na un akuerdo final, e orei lo presentá e proposishon di kambio dje presupuesto pa 2025.
Frakshon di MFK a tuma nota ku CFT tambe a remarká ku den e promé “Uitvoeringsrapportage” pa 2025, por tuma nota ku 2025 lo sera ku un saldo positivo di 161 mion, lokual ta pone ku Kòrsou ta kumpli ku e normanan di presupuesto pa loke ta trata e Lei di kòntròl finansiero di Reino (Rft). Tambe nan a tuma nota ku a mehorá i amplia e informashonnan den e “Uitvoeringsrapportage”, lokual ta brinda un mihó bista dje posishon finansiero di país.
Apesar di tur e desaroyonan positivo ku CFT mes ta hasi menshon di nan, tin otronan ku ta purba desakreditá trabou dje minister. Tin ku te asta ke frena e minister den su trabou. Nan lo ke mantené e minister manera ta mara un kachó na kabuya den kurá di kas, siendo ku nan no ta realisá ku “kachó mará, no por kuida kurá”. O sea, ku stroba e minister di hiba su maneho, esaki lo no kondusí na un desaroyo positivo di país.
Pues frakshon di MFK si ta aploudí i ta sostené Minister Silvania den su maneho pa sigui mehorá situashon finansiero di país, pasó ya a prepará e kuentanan anual di 2022 i 2023, ku awor lo enkaminá e proseso di kòntròl i konseho serka entre otro Raad van Advies i tambe Kontraloria General, pa finalmente nan bin Parlamento pa aprobashon. Finalmente frakshon di MFK ta konfia ku lo sigui enkaminá e proseso di implementashon pa na 2026 Kòrsou por yega na un “goedkeurende verklaring”.