E manera cu nos cuida, stima y proteha nos muchanan, nos adulto mayornan y nos animalnan ta
mustra ken nos ta como sociedad. Crèche no ta simplemente un servicio, e ta un base pa
desaroyo, siguridad y oportunidad igual pa tur. Parlamentario Ruthlyn Lindor ta enfatisa cu e
tema aki ta un prioridad fundamental pa futuro di Aruba.
Ningun mucha ta wordo forsa pa bai crèche na Aruba, y esaki nunca lo ta e intencion. Na Aruba,
enseñansa obligatorio (leerplicht) ta cuminsa na edad di cuater aña. Esaki a wordo introduci cu
un meta claro pa sera e buraco den desaroyo tempran y pa garantisa cu cada mucha tin acceso na
structura, educacion y por cuminsa socialisa na e etapa unda esaki ta mas importante. Segun
parlamentario Ruthlyn Lindor, e balansa entre proteccion y oportunidad mester keda central den
tur decision politico.
Como mama, mi ta comprende con valioso e prome añanan di infancia di un mucha ta. Si
circunstancianan ta permiti, mi ta sigur cu tur mayor, tanto mama como tata, lo prefera keda mas
tempo cu ta posibel na cas cu nan baby, pa nutri, pa crea un laso y pa guia e prome pasonan den
bida di nan yiunan. Pero pa hopi famia, e decision aki ta wordo determina pa realidadnan
economico.
Balance entre bida di famia y realidad economico
Den economia global actual, hopi mayor ta bai bek traha ora nan baby tin apenas seis pa ocho
siman di edad. Esaki no ta un cuestion di preferencia, pero di necesidad. Y den e momento ey,
mayornan ta confia nan baby, precioso completamente na e sistema di crèche. Parlamentario
Ruthlyn Lindor ta indica cu e confiansa aki ta exigi un respuesta fuerte di banda di gobierno.
E confiansa aki ta un di e responsabilidadnan mas grandi cu un sociedad por carga.
Si nos ta pidi mayor pa participa den mercado laboral, e ora ey nos como pais mester sigura cu
ora nan ta hasi esaki, nan muchanan ta sigur, ta wordo cuida y ta wordo guia den un ambiente
caminda nan por crece y florece.
Mas cu ley, un sistema cu ta traha
E ley riba kinderopvang ta esencial, pero e ta solamente e punto di salida. Locual berdaremante
ta proteha muchanan ta e sistema construi rond di e ley. Parlamentario Ruthlyn Lindor ta subraya
cu implementacion y control ta esencial pa logra resultado real.
Nos mester percura pa:
Tin normanan di calidad pa cada crèche. E normanan di calidad aki mester wordo revisa,
enforsa y controla constantemente.
E lidernan y cuidadornan di crèche ta equipa no solamente pa supervisa, pero pa
spelenderwijs (door di hunga) guia e muchanan den nan desaroyo.
Tin toezichthoudernan (autoridadnan di supervicion) activo y efectivo den nan control
y nos mester percura cu e crèchenan ta wordo tene responsable pa siguridad di e
muchanan bow nan cuido.
Pasobra crèche no ta solamente supervision, e ta desaroyo, cuido y futuro di nos muchanan.
E prome añanan, e base di tur loke ta sigui
E etapa di ifancia di un mucha bida ta forma idioma, siguridad emocional y coneccion social. Ta
aki muchanan ta desaroya confiansa, forma relacionnan y cuminsa comprende e mundo rond di
nan. Ora nos guia muchanan bon den e añanan aki, nos ta fortalece nan caminda pa educacion,
conducta y bienestar general.
Pesei nos no por perde bista di nos muchanan den e fase critico aki. Segun parlamentario
Ruthlyn Lindor, e inversion den e prome añanan di bida di un muchata un inversion directo den
futuro di nos pais.
Inclusion for di e cuminsamento
Un sistema fuerte di kinderopvang mester ta inclusivo for comienso. Tur mucha, sin importa su
nesesidad di desaroyo, mester tin acceso na un ambiente sigur y stimulante
Pasobra cada mucha ta conta, y cada mucha merece e oportunidad pa desaroya te na su maximo
potencial.
Un responsabilidat cu nos mester cumpli hunto
Kinderopvang ta situa na e punto di encuentro entre famia, economia y sociedad. E ta exigi cu
nos tin cu sostene mayornan cu ta traha y alavez proteha bienestar di nos muchanan.
Mayornan mester por bai traha sabiendo cu nan muchanan ta sigur.
Muchanan mester por crece den ambiente cu ta nutri nan potential completo.
Esei ta e standard cu nos mester pone.
Y esei ta e responsabilidat cu nos mester cumpli cune.
Paso na Aruba ningun mucha no mester keda atras. Cada mucha ta conta!
