Merdia cu e districtsrecherche (recherche distrital) tin gran preocupacion, pasobra structuralmente nan tin añanan largo caba cu un falta serio di personal. Y apesar de esey, nan ta traha hopi duro y nan ta haci un trabou fantastico; mi tin hopi respeto pa esey. E Korps Management Team (KMT) ta totalmente di acuerdo cu e preocupacionnan di e sindicato y di e personal di recherche.
Mi ta haya lamentabel cu e cosnan a yega asina leu y cu e coleganan ta sinti cu nan mester bay den welga, pero mi ta respeta esey pasobra e ta parti de nos democracia y ta trece e problemanan y preocupacionnan na cla.
Como cuerpo policial, nos tin e mesun meta ainda y un responsabilidad comparti, locual ta pa percura pa siguridad den nos comunidad y e bienestar de nos personal. Semper mi ta entrega mi mes 100% pa esey, y lo mi sigui haci esey te ora mi retira otro aña den zomer.
Berdad tin cartanan cu e minister a manda pa mi cu ordennan, pero e Procurador General tambe tin di haber cu esey. Bo no por kita hende asina diripiente for di un departamento caminda tin varios investigacion andando; corda cu tur departamento dentro di e cuerpo tambe tin falta di personal. Ya caba a haci acuerdonan e siman aki pa reforsa e districtsrecherche, y a duna contenido na e peticion di minister: a haca hende pasa pa e districtsrecherche, y a comunica esaki cu nan tambe.
Ministerio Publico (OM) berdad a manda cartanan, pero no pa mi, sino pa e minister, y mi a ricibi un copia di esaki pa mi informacion. E contenido ta trata e echo cu nan ta constata cu henter e cadena hudicial tin un falta di personal masha halto mes tur caminda, incluyendo OM mes, banda di entre otro KIA y KPA. Pa e razon ey, OM a indica cu nan no ta persigui denuncia mas, loke ta haci cu e personanan cu entrega un denuncia no ta haya un seguimiento.
Como cuerpo policial, nos tin un falta masha serio y halto di personal, mas cu 30%. Pero no ta trata di e porcentahanan ey, pasobra nan no ta realistico mas tampoco. E formacion de e cuerpo ta bin di e plan di structuracion di aña 2011, cu ta 15 aña pasa. E comunidad a bira mas grandi y e tareanan di polis awor structuralmente ta mas compleho y amplio, mi denter cu nos personal a keda mescos, y pa añanan largo structuralmente bou di e cantidad necesario.
Awor nos mester haci e trabou cu loke nos tin, y nos ta haci esey tambe: nos ta sigui traha. Nos ta purba na ta creativo via automatizacion, inversion den tecnologia, y caminda por, via move personal caminda esey ta posible. Pero e berdadero solucion mester ta sostenibel; mester tin placa den e proximo añanan pa entrada di personal nobo via clasenan di scol di polis.
Desde cu mi ta korpschef (hefe di poliz), mi a bringa duro pa esey tambe, y desde cu mi t’ey, despues di 8 aña tin clase structuralmente atrobe. Exactamente asina tanto clase cu nos scol di polis por maneha; cu esey e falta di personal a baha un poco. Pero e realidad ta tambe cu si bo no tin entrada di personal nobo pa añanan largo, pero si salida structural pasobra coleganan ta bay cu pension, e crecementu no ta bay rapido y e problemanan ta keda.
Mi no a ricibi ningun invitacion cu mi a nenga; semper mi ta bay den combersacion cu tur hende. E presidente mes ta esun cu no ta acepta un invitacion pa reunion, pero mi ta sigui invita e y e directiva di sindicato. Mi ta spera cu un dia e lo bin; mi ta dispuesto pa busca solucion hunto cu ne y cu e directiva.
Berdad e presidente ta indica cu e no kier papia, sino cu e kier mira accion y solucion directo awor. Mi tin un poco dificultad cu esey, pasobra prome bo mester compronde un problema prome cu bo busca un solucion, y hopi mas prome cu bo haci declaracion tocante e otro persona sin cu bo a papia cu ne. Esey ta causa polarisacion, y esey ta locual ta pasand awor: nos no ta den combersacion cu otro. Di tur manera, mi ta sigui busca conexion cu e sindicato y nos ta sigui enfoca simplemente riba e trabou di polis y e bienestar de nos personal.
Mi ta reconoce e problema na e districtsrecherche, pero simplemente muda hende rapidamente no ta e solucion; esey ta crea riesgonan pa otro tareanan esencial di polis. E directiva (goblerno) ta esun cu tin e turno pa pone recursonan disponibel, y no solamente awor, sino structuralmente pa e proximo añanan.