E aña aki, un biaha mas, Departamento di Cultura y Popcorn Club a organisa e Proyecto “Gang di Arte-Dream Dare Do”, caminda hobennan ta haya e oportunidad di haya guia y demostra nan talento.
Gang di Arte (GDA) ta un proyecto di Departamento di Cultura bou di auspicio di Minister di Cultura cu a inicia na aña 2007. Meta di GDA ta pa ofrece un plataforma di arte unda hubentud por expresa diferente disciplina den arte y Dream Dare Do (DDD) ta un proyecto organisa pa Popcorn Club. Meta ta pa crea, encurasha y fortalese lidernan hubenil como tambe pa descubri, motiva y engrandece e hobennan cu ta interesa den arte.
Esaki ta di cuater aña consecutivo cu e dos proyectonan aki ta ser combina hunto y ta siña e hobennan diferente disciplina artistico durante un siman. E hobennan ta entre e edad di 13 pa 20 aña unda nan ta haya tayer di baile, musica, teatro y tambe arte visual. Como cu tur dos proyecto tabata tuma luga tur aña durante vakantie grandi, pa e motibo aki a dicidi na uni e dos proyectonan aki.
E proyecto aki ta encera tambe un intercambio cultural, unda cu Lider y hobenan a bin for di Hulanda, Inglatera, Spañe a uni cu Aruba pa forma parti di e tayernan.
Den e siman di 10 pa 19 di juli ultimo, un cantidad di 125 hoben a ricibi tayernan di e.o. baile di diferente genero, teatro y musica cerca lidernan hoben na entre otro den cantina y e salanan MFR 1, 2, 3 y 4 di John F. Kennedy Education Center, na Plaza Betico y na Incubator na Cas di Cultura.
Despues di e tayernan, den oranan di anochi e participantenan tabata tin diferente actividad social y cultural planea, como tambe un ‘Island Tour’.
E resultado di tayernan a wordo estrena dia 19 di juli ultimo riba e tarima di Cas di Cultura.
Awo lo sigui cu e preparacionnan pa competencia mes di Gang di Arte. E final di e competencia di lo ta 9 di november 2022.
Minister di Cultura ta gradici Departamento di Cultura Aruba y Popcorn Club pa organisa otro exitoso tayer di Gang di Arte-Dream Dare Do. Igualmente ta gradici tur persona cu a duna nan sosten pa e proyecto di GDA y DDD por a logra su meta. Tambe minister ta extende for di awor caba un invitacion, pa bin apoya nos hobenan talentoso den e competencia di Gang di Arte 2022 dia 9 di november venidero den Cas di Cultura.
