Awe partido MEP ta yama un reunion cu caracter di urgencia mirando e desaroyonan cu ta tumando luga na e momentonan aki. Parlamentario Evelyn Wever Croes ta duna di conoce cu na e momentonan aki tin un tension pa loke ta trata nos democracia, pero tambe tin un tension pa loke ta trata funcionamento di nos parlamento y tin un tension pa loke ta trata nos autonomia di Aruba y tin un falta di informacion grandisimo.
Sinembargo no ta partido MEP ta esun responsabel pa duna informacion, pero gobierno di AVP-FUTURO ta nenga di duna esaki. Pesey mes partido MEP a indica cu lo yama un reunion cu caracter di urgencia y ta invita Aruba completo pa ta presente na cede di MEP , pero tambe lo transmiti esaki den medionan social pa esnan cu no por yega pero cu por sigui e reunion di cerca pa asina duna informacion.
Segun Lider di partido MEP basicamente e echo cu gobierno di AVP –FUTURO manera un ladron di anochi a bay entrega un Rijkswet na Hulanda te cu e la keda trata den conseho di minister di Reino y te cu conseho di minister di Reino a bay diacuerdo cu ne. Sinembargo dialuna ultimo prome minister di Aruba Mike Eman tabata den parlamento y dia 20 di augustus a haci prome minister Mike Eman e pregunta con ta para cu e negociacionnan y si ta haya ta necesario pa un Rijkswet mirando con Aruba ta para na e momentonan aki pa ainda bay den un direccion di Rijkswet.
Sinembargo dia 25 di augustus prome minister Mike Eman ta duna un contesta cu ainda no ta cla cu e negociacionnan cu Rijkswet y cu ainda ta negoshando pero cu ta tratando di tin un relacion stabiel cu Hulanda. Segun lider di MEP aki por mira claramente cu prome Minister Mike Eman a gaña parlamento mirando cu 5 dia despues e Rijkswet a keda entrega na Hulanda y Rijksminister Raad a aproba e ley , pero loke ta un realidad cu den 5 dia nada no ta subi riba agenda di Rijksminister Raad te pa e wordo aproba, esaki ta e wega sushi y vies cu prome minister Mike Eman , Minister Gerlien Croes y Geoffrey Wever a hunga cu parlamento y a pueblo di Aruba.
No solamente nan a sconde informacion pero a bay tras di lomba di parlamento y a gaña henter un pueblo. Lamentablemente parlamentario di AVP y FUTURO ta hopi mal informa nan no conoce e dossier, nan no conoce e materia y mas ainda a ofrece nan pa haya informacion pero no tabata kier. Sinembargo por tuma nota cu mayoria di e parlamentarionan di AVP y FUTURO ta un generacion nobo cu ainda no sa kico ta come y bebe di situacionnan di Aruba y pio ainda ta tuma un postura di no kier informacion, lider di MEP ta lamenta e actitud aki paso ta pa un Aruba nos ta traha.
Sinembargo tanto prome minister, minister Gerlien Croes y minister Geoffrey Wever no ta duna su parlamentarionan informacion y esaki ta muestra di nan maldad unda cu na momento cu bo ta dicidi di laga bo parlamentarionan ignorante ta e miho manera pa haci loke bo kier den gobierno.
Loke cu gobierno di AVP-FUTURO a haci ta un violacion di nos principionan democratico, na momento cu un cos ta ilegal e ora un hende mester tin e curashi di pone un sancion e ora algo ta pasa. Porehempel si pasa den luz cora y ningun hende no ta worry bo a pasa den dje. Sinembargo na e momentonan aki e bala ta den scochi di e parlamentarionan di AVP y FUTURO nan ta e parlamentarionan cu mester para y exigi respet. Loke cu gobierno di AVP-FUTURO a haci cu Hulanda unda cu a bay tras di lomba di parlamento sin informa parlamento nan ta esun cu mester para y exigi di gobierno pa pidi disculpa y admiti cu nan a haci un eror. Lider di fraccion di MEP ya caba a manda un carta na prome minister Evelyn Wever Croes unda cu ta exigi un disculpa y splica dicon a haci e paso aki.
E invitacion ta keda pa pueblo di ta presente na cede di MEP awe dialuna prome di september pa 7:30 di anochi tin un reunion di caracter di urgencia caminda cu ta bay trata e tema di Rijkswet , e procedura y e tema di Rijkswet.