Lider di fraccion di PPA, Eduard Pieters, a enfatisa cu e reunion reciente cu Raad van State ta ratifica e posicion cu partido PPA a hiba for di principio relaciona cu e yegada di “Consensusrijkswet overheidsfinanciën Aruba” (Hofa). Segun Pieters, tanto Raad van Advies como Raad van State a duna PPA rason cu e articulo 38, manera e ta formula awor aki, no ta bon presenta y ta mina nos Constitucion.
Durante e reunion cu Raad van State (RvS), PPA a pidi palabra ora a trata Hofa. Particularmente pa analisa e conseho cu tin riba mesa. Pieters a recorda cu semper PPA a boga pa trece claridad riba e asunto aki. E lider di fraccion a splica cu ya caba Raad van Advies (RvA) di Aruba a pidi pa “schrap e” (kita) e forma con e articulo tabata stipula, mientras cu RvS a duna di conoce cu e articulo mester di cambio pa e ta mas cla.
Concentracion riba e aspecto cuantitativo di e normanan
RvS a duna conseho pa cambia articulo 38 pa e ta concentra riba e aspecto cuantitativo di e normanan stipula den e ley concepto local cu ta Landsverordening waarborging houdbare overheidsfinanciën. E conseho aki ya ta pidi pa un cambio hopi grandi den e articulo 38. Sinembargo ainda e ta mina nos Constitucion articulo V.1 y V.2.
Articulo 38 no ta bon segun RvA y RvS
“Ora bo ta hiba un conseho asina padilanti, e ta nifica simplemente cu articulo 38 pa loke ta trata e Rijkswet HOFA no ta bon,” Pieters a declara, agregando cu esaki ta duna PPA rason un biaha mas cerca e dos instancianan cu ta “Hoge College van Staat” cu a duna e conseho riba e ley. Mas leu cu simplemente critica e situacion, Pieters a enfatisa cu PPA a probecha di e reunion aki pa uza su papel di manera proactivo. Pieters a lanta y a presenta mas posibilidad y alternativanan pa purba soluciona e cuestion aki despues di a evalua e dos consehonan.
Fraccion PPA a presenta un solucion
Segun e parlamentario, e meta final por keda mesun cos, pero por cana riba “diferente ruta” pa por yega na e obhetivo sin perhudica e Constitucion di e pais. Pieters a enfatisa cu ta bon pa e instancianan “scucha y ricibi” e sugerencianan aki y hiba e mensahe mas leu denter di e mundo politico na Den Haag. Pieters a duna di conoce cu nan rol no ta solamente pa bini cu puntonan skerpi y critica, sino cu semper nan ta structuralmente trece “solucionnan” riba mesa.
