Ex líder di Movimiento Electoral di Pueblo (MEP) y ex Primer Ministro di Aruba, Orlando Nelson “Nel” Oduber, tabata entre e invitadonan prominente na e acto conmemorativo di 55 aña di existencia di MEP na su cede central. Su presencia a agrega peso historico y simbolico na e anochi di reflexion politico.
Oduber no solamente ta recorda como ex mandatario di Pais Aruba, sino tambe como un di e arkitectonan principal di e proceso pa logra Status Aparte. Segun Oduber, su rol den e lucha constitucional a marca un antes y un despues den historia di Aruba, y te awe ningun hende por minimisa significado di e logro aki pa pais y su ciudadanía.
Den su intervencion, Nel Oduber a felicita tur persona cu a forma parti di MEP den pasado y presente y a gradici nan dedicacion den construccion di structura estatal, maneho financiero, desaroyo economico, politica social y deporte. E a recorda cu MEP a wordo funda bou di liderazgo di Betico Croes (q.e.p.d.), y despues su persona a sigui cu e vision, cu actualmente ta wordo lidera pa Evelyn Wever-Croes, cu ya tin 15 aña na cabes di partido.
Oduber a subraya cu MEP, desde su fundacion dia 9 februari 1971, rapidamente a logra asiento den Parlamento y nunca mas a perdi su posicion como forsa politico relevante. “E tarea mas grandi semper a keda pa mantene MEP fuerte, cu vision y direccion claro pa Aruba,” e a enfatisa.
E a menciona algun logro clave di MEP, entre otro:
- Atraccion di cadena hotelero internacional den un tempo cu poco hende tabata confia den Aruba;
- Creacion di Arubus como servicio publico esencial;
- Institucionalizacion di Himno y Bandera;
- Fortalecimiento di structura estatal;
- Resolucion di tension financiero y constitucional cu Hulanda den añanan anterior.
Un punto importante den su discurso tabata deporte. Segun Oduber, deporte no ta simplemente recreacion, sino un herment pa forma disciplina, responsabilidad y condicion pa bida laboral y social. E a lamenta cu, segun oduber, hopi hende ainda ta subestima su balor.
Oduber tambe a referi na e controversia rond di BBO (Belasting op Bedrijfsomzetten). E a afirma cu e a bin cu e propuesta di 3% pa yuda Aruba financieramente, pero cu un campaña politico posteriormente a manipula opinion publico pa elimina e impuesto aunke finalmente e BBO a keda y hasta a aumenta.
Den un tono mas critico, e a declara cu e no ta mira ningun vision claro den actual gobierno AVP–FUTURO, y cu nan maneho ta “ad hoc” y reactivo. Den contraste, e a elogia gobierno anterior di MEP bou di Evelyn Wever-Croes pa stabilisa economia, baha debe di pais y maneha crisis di pandemia y exigencianan di Hulanda.
Un di su critica mas fuerte tabata e ausencia prolonga di un Ministro Plenipotenciario na Hulanda. Segun Oduber, ta “inaceptabel” cu casi un aña despues di forma gobierno, Aruba ainda no tin representacion oficial na Hulanda pa defende su interesnan den Reino Hulandes.
“Sin Ministro Plenipotenciario, Aruba ta sin voz na Hulanda,” e a afirma, calificando e situacion como un muestra di falta di vision strategico di actual gobierno.
E a conclui gradiciendo MEP como e vehiculo politico cu a duna dje y hopi otro Arubianonan e oportunidad pa sirbi pais, y a anima generacion nobo pa sigui traha pa un Aruba fuerte, uni y respeta den Reino Hulandes.
