Dialuna ultimo, Raad van State di Hulanda a publica su conseho oficial riba e Ley di Reino HOFA. Mescos cu Raad van Advies a indica caba anteriormente, Raad van State tambe ta conclui, specificamente riba pagina 5 di nan conseho, cu HOFA ta limita e autonomia di nos pais. Sra.Wever-Croes, lider di fraccion di MEP, a declara lo siguiente: “Nos ta bolbe haya rason. Esaki ta exactamente loke nos a bini ta enfatisa desde augustus 2025, ora cu gobierno a presenta e documento cu nan a firma pa HOFA.”
Wever-Croes a subraya cu e ‘NOS’ aki ta encera un union nacional amplio, consistiendo di: partido MEP, partido PPA, sr. Mike de Mesa di AVP, tur e sindicatonan, expertonan riba tereno huridico, y mas di 10 mil firmante cu a para pa defende nos pais.
Un punto final na e discusion
E lider di partido MEP a expresa su satisfaccion cu e conseho ricibi, destacando cu esaki ta pone un punto final definitivo na e discusion di si HOFA ta limita nos autonomia.”E discusion ya no ta ‘si’ HOFA ta limita nos autonomia; e cuestion ta si ta husto pa Hulanda impone e condicion aki, net awor cu Aruba su finansas ta bayendo asina bon, manera Raad van State mes a confirma.” Wever-Croes a enfatisa.
Exigencia inhusto
Tanto Raad van State como Raad van Advies ta enfatisa e importancia di tin un ‘exit regeling’ (areglo di salida) adecuado, locual no ta wordo stipula den e ley actual. Den esaki, Raad van Advies ta bay mas leu y ta explicito: Aruba no por dicidi pa su mes structuralmente ki tempo e ta sali, sino cu e mester depende netamente riba permiso di Hulanda. Sra. Wever-Croes a señala cu e falta di un bon areglo di salida ta elimina e principio di ‘vrijwilligheid’ (boluntad propio) y consecuentemente no por papia di consensus. Pa por tin un consensus real, mester existi e libertad tanto pa drenta como pa sali, y esey no ta e caso awor.
Ademas, Raad van State ta hopi critico riba e falta di claridad di e ley, ya cu e no ta stipula concretamente kico e beneficionan ta, ni cua debenan lo bay wordo refinancia. Alabes, e organo supremo di conseho ta cuestiona e ausencia di un bista transparente riba e proyectonan di PPP (Public-Private Partnership) cu e gobierno di AVP a sera den e periodo di 2009-2017.
Wever-Croes ta spera cu gobierno di Aruba ta realisa cu nan no por sigui cu HOFA manera e ta awor. El a señala cu e discusion mester wordo hiba tanto aki como na Hulanda, pa cuestiona si e limitacion di nos autonomia ta un condicion husto pa baha e interes di 6.9% pa 3.4%. E lider di MEP a enfatisa cu, mirando e situacion financiero actual di Aruba, e no ta husto pa exigi pa entrega autonomia djis pa un reduccion di interes.
Un bista selectivo di e realidad
E lider di MEP a cuestiona e ‘roadshow’ di gobierno, den cual e Minister di Finansas a purba convence e gremionan comercial cu HOFA no ta limita nos autonomia. Segun Wever-Croes, e Minister di Finansa a purba di tur forma posibel pa convence e sector comercial cu HOFA no ta limita e autonomia di nos pais. Awor cu e detayenan ta sali na cla, ta bira mas cu obvio cu e minister a duna un bista selectivo di e realidad. Ta precisamente pa e rason ey e mandatario tabata insisti na mantene e oposicion fuera di e reunionnan aki.
El a finalisa su declaracion cu un yamada directo na gobierno: “Awor no ta MEP, PPA, sr. De Meza di AVP, e sindicatonan, y e mas di 10 mil firmantenan so ta bisa cu HOFA ta limita nos autonomia. Awor Raad van Advies y Raad van State tambe ta confirma esey. Mi ta spera cu gobierno uza e consehonan aki como aliado, bay mesa bek cu Hulanda, y para firme pa nos autonomia.”