Eduard Pieters: “Nos mester sigui hiba e bos di Aruba den e lugarnan, unda ta tuma e decisionnan”
Den un tempo unda e relacionnan dentro di Reino Hulandes ta enfrenta debate cada biaha mas intenso, un realidad ta sali na cla durante e reunionnan di IPKO na Hulanda: futuro di nos pais no ta determina cu slogan of cu e declaracionnan den medio, sino cu dialogo, conviccion y presencia den e lugarnan, unda realmente ta tuma e decisionnan pa Reino.
Parlamentario Eduard Pieters di fraccion di PPA a enfatisa precisamente e punto ey durante su participacion na e encuentro interparlamentario cu a reuni representante di Aruba, Corsou, Sint Maarten y Hulanda.
Un reino fuerte ta cuminsa cu comprondemento mutuo
Un di e momentonan cu mas a resalta durante e reunionnan tabata e presentacion di un grupo independiente di experto, cu a analisa e estado di democracia dentro di Reino Hulandes.
E expertonan a enfoca riba cinco dimension fundamental: representacion, influencia, control y rendimento di cuenta, balansa/simetria di poder y capacidad institucional. Segun Pieters, e ultimo punto, esta capacidad institucional, ta un di e aspectonan mas decisivo pa e futuro di Reino y tin influencia riba e otro dimensionnan.
“Bo no por papia di equidad, participacion ni autonomia si bo no tin e capacidad institucional pa ehecuta esakinan,” el a indica.
Pa Pieters, e estudio aki no solamente ta aporta na conocemento academico, sino tambe ta brinda un oportunidad unico pa Reino Hulandes mira su mes cu honestidad y wak unda tin espacio pa mehora.
Scucha cu bo mente, pero tambe cu bo curason
Durante diferente sesion y tayer, un tema central a sigui bin dilanti: colaboracion real ta cuminsa cu scuchamento real.
No ta suficiente pa djis tende loke otro pais ta bisa. Mester compronde e preocupacionnan, e experiencianan y e realidadnan cu ta tras di cada posicion.
Segun Pieters, hopi biaha e relacionnan dentro di Reino ta afecta door di e percepcionnan y e prehuicionan, cu no semper ta refleha realidad.
“Ora nos sinta na mesa y papia cu honestidad, nos ta compronde mihor, unda cada pueblo ta biniendo for di dje.”
Precisamente p’esey, PPA a haci un esfuerzo consciente desde e biahe di Pieters na april 2026 pa mantene dialogo directo cu diferente actor politico na Hulanda.
Defende Aruba ta mas cu critica
Pieters a reconoce cu ta facil pa critica for di distancia, pero cu e trabou berdadero ta otro.
“Ta facil pa para na Aruba y critica. Pero e trabou real ta, ora bo sinta na mesa cu e otro persona, wak otro den cara y hiba e combersacionnan dificil cu mester sosode.”
Segun e parlamentario, precisamente p’esey fraccion di PPA a sigui haci e esfuerzo pa mantene encuentro y dialogo cu diferente fraccion y representante di Hulanda. No pa crea conflicto ni pa busca confrontacion, sino pa sigura cu e posicionnan di Aruba ta scucha y comprondi den e lugarnan, unda ta tuma e decisionnan.
Aruba mester sigui laga su bos resona
Un tema cu naturalmente ta sigui presente den diferente combersacion ta e discusion relaciona cu Rijkswet HOFA.
Aunkue e tema no ta forma parti oficial di agenda di IPKO, Pieters a confirma cu PPA ta sigui sostene encuentro cu diferente representante politico pa comparti e preocupacionnan constitucional, cu ta existi riba e proposicion.
“Nos kier pa cualkier decision cu eventualmente wordo tuma, ta basa riba informacion completo, respetando nos posicion constitucional y nos autonomia como pais.”
Liderazgo ta construi brug
Pa Pieters, e les principal di e reunionnan aki ta cla. Aruba no ta beneficia di distancia ni polarizacion. Aruba ta beneficia di liderazgo cu ta para firme den su principionan, pero cu tambe ta dispuesto pa sinta na mesa y hiba e dialogo necesario.
“Nos a haci un huramento pa representa pueblo di Aruba y salvaguardia nos pais. Esey no ta logra cu grito, pero cu argumento, respet y perseverancia.”