Local

Pastor Marcel Balootje: Rechasa tur palabra y pensamento negativo for di riba bo bida

Pastor

Morto y bida ta den e poder di lenga, y esnan cu stima esaki lo come di su fruta.( Proverbionan 18:21).

Negativismo y maldad ta purba domina mundo cada dia, inmoralidad ta purba penetra, na un forma suave y sofistica, y nos mester ta wowo habri pa asina nos desmantela tur plan di e enemigo.

Palabra di Dios ta siña nos tur dia lo siguiente: Pasobra nos lucha no ta contra carni y sanger,, sino contra e gobernantenan, e podernan, contra e forsa nan mundial di scuridad aki, contra e forsanan spiritual di maldad den e lugarnan celestial ( Efesionan 6:12).

Pesey nos tin autoridad den e nomber di Cristo, pa reprende,mara, basha bao, tur forsa y palabra negativo cu ta bini den nos direccion, y nos mes como persona mester wak bon kico nos ta papia riba nos bida, y nos famia. Pasobra tur locual hende sembra nan lo cosecha .( Galationan 6:7)

Hopi hende ta tuma como custumber, di maldiciona nan sernan keri cu palabra nan ofensivo, y despues nan kier mira bon fruta y flor aparece den nan hardin, sin cu nan ta recorda locual nan mes a papia riba bida di un mucha constantemente ora e tabata chikito.

No laga ningun palabra dañino sali for di boso boca, sino solamente palabra cu ta bon pa edificacion, conforme e necesidad di e momento, pa esaki duna gracia na esnan cu ta tende.

Palabra negativo no ta bon pa bida di ningun hende y hasta pensamento negativo ta haci hende malo, pasobra e ta causante di stress, depresion y hasta amargura.

Ora algo no bay bon den nos bida, no laga nos papia di fracaso, pero laga nos considere un oportunidad pa siña. Y un experiencia di bida, pasobra nunca a sali for di boca di Hesus e palabra di fracaso pa nos como yuinan di Dios. Semper Dios ta duna oportunidad pa lanta bek, y sigi padilanti.

E palabra di Dios ta siña nos pa nos renoba nos mente, pa nos por comproba kico ta e bon , y agradabel y perfecto boluntad di Dios pa nos bida.(Romananon 12:2).

Pasobra maske nos ta cana den carni, nos no ta bataya segun carni, pasobra e armanan cu nos ta bataya cune no ta carnal, ma poderoso den Dios, pa basha e fortinan abao, y pa destrui speculacionnan y tur arogancia, cu ta wordo lanta, contra e conosemento di Dios,hibando den cautiverio tur pensamento, pa haci nan obedecido,na Cristo.

Palabranan negativo ta bay contra e conocemento di Dios, pasobra nos Dios ta declara palabra nan di bendicion riba nos bida, y ta hopi importante pa nos tambe papia palabra di bendicion riba bida di nos prohimo.

Tin palabranan cu no mester wordo menciona den nos cas, ni tampoco riba bida di nos yuinan, ni tampoco den nos relacion matrimonial, pasobra Dios a yama nos pa edifica otro y no pa descurasha otro, y hopi biaha insultonan baho, y violencia ta haci hopi mas dolor y ta laga herida profundo, pesey for di profundidad di nos curason , nos tur den nos hogar, mester pensa y midi con nos ta papia cu otro.

Ma Ami ta bisa boso,ken cu rabia cu su ruman lo ta culpabel dilanti di corte, y ken cu bisa su ruman, “Kens”lo ta culpabel pa bay dilanti di concilio, y ken cu bisa “Bobo” lo ta culpabel pa bay den candela di fierno.( Mateo 5:22).

Dios ta haci un yamada riba nos tur pa reconcilia, cu otro mescos Cu Dios a reconcilia su mes cu nos den Cristo Hesus.( 2 Corintionan 5:19).

Related posts

Minister Endy Croes: Historia di Lotto pa Deporte

EA News Author

DEA ta muda pa John F. Kennedy Education Center

EA News Author

Unidad di Ehercito Real un biaha mas tin ehercicionan den Region di Caribe Hulandes

EA News Author

Leave a Comment

Whatsapp Message