Parlamentario Edgar Vrolijk a expresa su satisfaccion cu e conseho reciente di Raad van State. Segun Vrolijk, e conseho aki ta bini pa complementa loke ya keda stipula pa Raad van Advies, particularmente pasobra e ta duna balance na e preocupacionnan cu e mes y e oposicion a boga p’esei relaciona cu e limitacionnan di e autoridad parlamentario.
E parlamentario a enfatisa cu e conseho di Raad van State ta confirma cu e autoridad di e representantenan di pueblo y e propio constitucion di e pais por keda afecta. Maske e palabra “temporal” (tijdelijk) ta keda uza den e discusionnan, Vrolijk ta pidi pa ta masha cauteloso.
Un di e preguntanan cardinal cu Raad van State ta haci, segun Vrolijk, ta con por delinea kico ta temporal si no tin claridad riba e proyectonan di PPP (Public-Private Partnerships) of e fiansanan cu mester keda mantene pa un cierto porcentahe.
Ora bo no tin claridad riba e puntonan financiero aki, bo no por papia mas di un situacion temporal; e ora ey e medidanan ta bira permanent,” Vrolijk a splica.
E la duna un ehempel pa e pueblo por compronde mas facil: e regla ta stipula cu mester mantene un limitacion di debe (debt-to-GDP) abou di 50% pa tres aña consecutivo. Sinembargo, si añadi e debenan di e PPP-nan riba e debe aki, e porcentahe ta subi automaticamente. P’esei mes, Raad van State ta exigi claridad si e sumanan aki ta keda riba of for di e balance sheet.
Segun e parlamentario, e realidad ta cu Aruba por keda atrapa den un bubbel financiero pa un periodo largo di 10 pa 15 aña, perdiendo asina su autonomia financiero.
Vrolijk a mustra su mes hopi preocupa tambe pa e echo cu pa cualke ley cu tin un consecuencia financiero na Aruba, mester di e aprobacion di e Rijksministerraad (Conseho di Minister di Reino). Esaki, segun e parlamentario, ta nifica un perdida grandi di e “bisa” cu e pueblo por dicidi riba su propio placa y progreso, haciendo e trabou di un parlamentario hopi mas dificil.
Ademas, Vrolijk a lansa un critica skerpi direccion di un minister cu, segun su declaracion, a ‘copy-paste’ un articulo for di prensa cu tabata paga pa gobierno di Aruba mes.
Ta un berguensa cu Raad van State mes mester a reacciona riba e articulo ey pa mustra cu e no ta cuadra absolutamente cu e conseho real cu nan a duna,” Vrolijk a declara.
Vrolijk ta corda e ministernan cu nan tin un rol importante y cu nan ta e cara di e pais, p’esei nan mester hiba cosnan na un nivel mas halto y traha realmente pa Pais Aruba.
Pa terminá, Edgar Vrolijk a reiterá cu e conseho di Raad van State ta un bon instrumento cu ta substancia no solamente e ponencia di e oposicion, sino tambe e bos di e sindicatonan (vakbonden) y di mas cu 10,000 firmanan di ciudadano cu a opone e “Ley di HOFA”.
Parlamentario Edgar Vrolijk ta conclui cu maske e por ta un caminda largo pa fix e asunto aki, e solucion mester bin via un areglo interno mutuo of dor di cambia e ley trankilamente, semper teniendo na cuenta e interes di e pais y remediando e fiansanan cu a bini for di e tempo di e pandemia di COVID-19.
