Un sistema fragmenta, falta di inversion y un triplificacion den casonan di riesgo ta menasa
e futuro di 30.000 mucha na Aruba.
ORANJESTAD – Jeugdgezondheidszorg (JGZ) di Aruba ta enfrenta un crisis profundo cu
por tin consecuencia grave pa un generacion completo. Parlamentario Tevreden ta bati alarma
riba e realidad cu e sistema actual no ta ekipa mas pa atende e demanda creciente, mientras
cifranan ta mustra un deterioracion rapido den salud fisico y mental di nos hubentud.
Scarsedad di personal: 4 FTE pa 30.000 mucha
Actualmente, JGZ tin apenas 4 FTE (empleado full-time) pa brinda cuido y guia na casi
30.000 mucha y hoben. Parlamentario Tevreden ta cataloga e situacion como uno cu no ta
sostenibel. Expertonan mes ta reconoce cu e ampliacion di capacidad ta urgente.
E meta ideal pa un cuido digno mester ta:
8 Dokter y 8 Enfermero
2 Ortopedagogo
1 Dietista
Sinembargo, te cu awe, e financiamiento pa cuido di adolescentenan ainda no a wordo
presupuesta, loke ta laga un buraco den e cadena di cuido.
Casonan a triplifica: Miho registracion of salud a empeora?
Parlamentario Tevreden a expresa su preocupacion pa e cifranan alarmante di salud den nos
poblacion escolar, caminda den periodo 2024-2025 e cantidad di indicacionnan entre mucha
di 4 te 12 aña a subi dramaticamente di 589 pa 1.879 alumno. Tevreden ta enfatisa cu esaki ta
representa casi un triplificacion di e casonan registra. Aunke e sector ta indica cu esaki ta
debi na un miho sistema di deteccion y registracion, e pregunta clave ta keda: nos sistema a
bira mas eficiente den registra, of e salud di nos muchanan ta empeorando? Un di e señalnan
mas alarmante cu Tevreden a resalta ta cu 45% di e indicacionnan aki ta relaciona cu
sobrepeso y obesidad.
Tevreden a recorda cu bou di e maneho di Gobierno anterior a logra implementa varios
iniciativa pa promove un estilo di bida saludabel, manera e programa “Cool to be Fit”, e
plataforma “Scol Saludabel”, cu ta cubri 17 di nos scolnan, y tambe e programa “Baby
Friendly Hospital” pa promove dunamento di pecho.
Tevreden ta exigi pa e plannan cu a keda drumi den lachi wordo realisa mesora pa frena e
crisis di salud:
Regula mercadeo di cuminda no-saludabel dirigí riba mucha.
Introduci bebemento di awa na scolnan.
Saca 'junkfood' for di cantinanan escolar.
Fragmentacion: tur hende ta traha, pero Minister no ta dirigi
Un di e debilidadnan mas grandi cu Parlamentario Tevreden ta señala den e sistema actual ta
e falta total di coordinacion. JGZ ta colecta hopi data, pero colaboracion entre instancianan ta
sigui ta fragmenta; informacion ta keda pega den sistema, coordinacion cu scol, trahador
social y cuido primario ta limita, y no tin un coordinador central cu ta supervisa e cadena
completo.
E resultado ta cu casonan ta wordo trata parcial, y no integral. Problema ta wordo pasa pa
otro instancia, pero no semper e ta wordo resolvi. E Parlamentario ta exigi pa e Minister
asumi un rol mas activo pa por mira un miho resultado y duna e seguridad cu e salud di nos
muchanan ta e prioridad principal.
Problemanan psicosocial ta keda subi
Ansiedad, depresion y absentismo escolar ta aumenta. Parlamentario Tevreden ta señala cu,
maske tin colaboracion cu Respaldo y otro partnernan, e monitoring di efectividad y e
temponan di espera no ta structuralmente bon organisa. E sector mes ta indica: cu sin un
coordinador central, e colaboracion ta keda fragmenta y, na final, e mucha ta esun cu ta keda
perhudica. Parlamentario Hendrik Tevreden ta enfatisa cu e problema aki no ta un falta di
placa, sino un falta di bon maneho; cu un direccion structural y coordina, lo por mehora e
asunto aki.
Pa e parlamentario, e pregunta fundamental ya no ta si tin un problema, sino kico Gobierno a
haci realmente pa preveni e crisis aki. El a adverti cu sin leyanan actualisa, sin direccion cla y
sin un inversion serio, Aruba ta core e riesgo iminente di perde control riba salud di su propio
futuro generacion. “E tempo di plania y sinta keto a pasa; awor ta e momento pa
Minister Wyatt-Ras mustra liderasgo y guia e departamentonan aki cu vision y bon
intencion,” Parlamentario Hendrik Tevreden a conclui.