Aruba a cay di prome pa di seis luga den siguridad den Caribe debi na recortenan den Husticia”Parlamentario di fraccion di MEP y ex-minister di Husticia, Rocco Tjon, a duna un splicacion detaya di con e recortenan presupuestario di e actual gobierno a cuminsa afecta e posicion di Aruba internacionalmente, dunando como resultado un caida dramatico den siguridad di nos pais.
Tjon a recorda cu e gobernacion anterior a entrega e minister actual un pais cu tabata categorisa pa varios portal internacional independiente como e isla mas seguro di e region Caribense. Sinembargo, segun e ultimo investigacionnan obhetivo cu a wordo publica, Aruba a perde e prome puesto aki y a cay te na di seis luga den e region.
Segun e parlamentario Rocco Tjon , e deterioracion aki no ta un casualidad, sino e resultado directo di e recorte di 10% cu e gobierno aki a aplica riba e presupuesto di Husticia for di nan prome dia di trabou na maart 2025.
Tjon a subraya cu e decision aki a wordo tuma a pesar cu e minister tabatin e advertencianan por escrito di tur e cabesantenan di e departamentonan di seguridad:
• Procureur-Generaal
• Korpschef di Cuerpo Policial
• Director di Korrectie Instituut Aruba (KIA)
• Director di Imigracion
Tur e lidernan aki a indica claramente cu e recorte di fondo lo tabatin consecuencianan grave pa e operacionnan y la siguridad di Aruba, pero e gobierno a dicidi di ignora e cartanan aki y sigui cu e medida.
Ademas di e paralysis di e radarnan, Tjon a trece dilanti dos punto di preocupacion alarmante:
1. Pa Cuerpo Policial: E sindicato di polis a manda pidi atencion di e minister y di Parlamento, pasobra tin mas di un aña y mey cu cierto puntonan specifico na fabor di e agentenan a wordo aproba, pero te dia di awe ningun a wordo ehecuta debi na e falta di fondo.
2. Proyecto di camaranan di siguridad na peligro: Tjon a duna un advertencia cu, mescos cu e radarnan, e proyecto di camaranan di vigilancia rond di e isla ta sufriendo atraso serio debi na falta di atencion y recurso di e minister. denter di poco, e sistema vital aki tambe ta den riesgo di stop di funciona.
“Siguridad ta costa placa,” Tjon a conclui, enfatisando cu e decisionnan inapropia aki no solamente ta laga e imagen internacional di Aruba, sino cu ta laga e comunidat y e propio agentenan di polis desprotegi.