Miembro di delegacion Hulandes den IPKO, Songül Mutluer, a expresa impresion positivo despues di su bishita na Aruba. Segun e parlamentario di alianza GroenLinks–PvdA, tin “hopi cosnan bon” cu ta sosode na Aruba y cu mester wordo reconoci y stimula.
Promer cu cuminsa e reunionnan formal di Interparlementair Koninkrijksoverleg (IPKO), delegacion di Hulanda a reuni cu Gobierno di Aruba y a haci diferente bishita rond di isla. E encuentro nan a duna, segun Mutluer, un bista mas amplio riba realidad local, tanto den ambito social como economico.
“Ta importante pa nos no solamente papia den sala di reunion, pero tambe mira cu nos propio wowo con Aruba ta desaroya,” e parlamentario a indica. Segun Mutluer, e bishitanan a mustra iniciativa local y compromiso cu progreso, algo cu delegacion hulandes a aprecia.