Ayera mainta banda di 11 or e Sentro di Reskate di Wardakosta a risibi un yamada di MAYDAY riba VHF kanal 16 di e boto MAGIC. E tripulante a informá e sentro di reskate ku nan ta mira algun persona riba beach di Klein Bonaire ta purba di reanimá un persona. Mes ora e Sentro di Reskate a informá e tim di Wardakosta ku ta stashoná na Boneiru. E tim a sali mes ora ku dos kolega di polis riba e boto Justice di Wardakosta. Nèt prome ku nan a sali a risibi e triste notisia di KPCN ku e persona no ta duna señal di bida mas.Ta trata di un turista Amerikano femenina ku a sinti su kurpa malu durante ku e tabata snòrkel i a guli hopi awa. No por a reanimá e señora mas. E tim di Wardakosta a transportá e viktima pa tera i a entregé na polis.
Kondolensia na e famia di e difuntu ku e perdida sensibel aki.