Parlamentario di fraccion di MEP y ex-minister di Husticia, Rocco Tjon, a duna un advertencia serio tocante e consecuencianan directo cu e radarnan di maritiem toezicht ta treciendo pa e siguridad nacional di Aruba.
Tjon a splica cu e sistema di radar ta e prome linea di defensa di e pais. Su funcion principal ta pa detecta den un etapa tempran e lanchanan ilegal cu ta acerca e costanan di Aruba,specialmente esnan cu ta haci uzo di rutanan no usual of cu ta navega den oranan di marduga. E deteccion tempran aki ta permiti e autoridadnan, manera Kustwacht y e unidatnan di polis na tera, pa actua di biaha y intercepta e botonan pa evita cu contrabando ta drenta nos isla.
E parlamentario a remarca cu e lanchanan ilegal aki ta e medio principal cu organisacionnan criminal ta uza pa drenta cu arma di candela, droga y traficacion di hende.
E simpel hecho cu e radarnan aki no ta funciona aworaki ta haci Aruba un ‘trekpleister’ pa e organisacionnan criminal aki,” Tjon a enfatisa, señalando cu e vulnerabilidad na e costanan ta habri porta pa criminalidad mas structural drenta e comunidad.
Segun Tjon, e impacto di e falta di control y e recortenan den e sector hudicial ya caba ta sinti den e bida di tur dia na Aruba. El a subraya cu esaki no ta simpel opinion politico, sino un realidad cu e pueblo y e medionan di comunicacion ta reportando diariamente:
• Area turistico: Un atraco recien den dia na un joyeria den e zona di hotelnan.
• Sector di transporte: Taxistanan cu ta wordo atraca, agredi y maltrata mientras nan ta haci nan trabou.
• Casnan di famia: Criminalnan drentando cas di hende pa comete atraco y horta.
Tjon a conclui señalando cu pa hopi aña e fenomeno di atraco tabata practicamente algo di pasado na Aruba, pero cu debi na e falta di maneho, e falta di fondo pa mantencion y e accion di e actual gobierno, e fenomeno aki alarmantemente a bolbe lanta su cabes. Pero na mes momento Minister di finansas a kita 10% di buged di husticia