Durante ceremonia significativo relaciona cu restauracion di Iglesia Adventista di Shete
Dia na Bernhardstraat, Prome Minister Mike Eman a enfatisa e balor di conserva
herencia historico, spiritual y comunitario di Aruba.
Prome Minister a expresa su aprecio na tur experto, lidernan di iglesia y
representantenan di organisacionnan cu a contribui na e proyecto, incluyendo profesor
Luciano Millard, Raul Gei director di Monumentenbureau, tambe diseñado y arkitecto di
restauracion y persona respeta Daphne Every di Ministerio di Asuntonan General, cu ta
traha como project manager pa diferente proyecto di restauracion actual, como tambe e
director nobo di Stichting Monumenten Fonds Aruba.
Eman a subraya cu e restauracion ta resultado di cooperacion entre diferente actor den
comunidad, unda conocemento tecnico y compromiso social ta bin hunto pa proteha
patrimonio historico.
Den su discurso, Prome Minister a indica cu e edificio no ta solamente un structura
fisico, sino tambe un luga cu tin significado special pa comunidad, unda a forma parte di
bida spiritual y social di hopi hende. Premier Emna a destaca cu pa hopi, e luga aki a
sirbi como fuente di orientacion, inspiracion y formacion di balornan.
Den un reflexion mas amplio, Prome Minister a menciona cu den un contexto global cu
ta enfrenta diferente reto, iniciativa manera esaki ta mustra importancia di mantene
conexion cu balornan fundamental, comunidad y responsabilidad comparti.
Eman a comparti tambe un experiencia personal di su bida, referiendo na un bisiña di
infancia cu tabata miembro di Iglesia Adventista, kende a contribui na su comprension
di disciplina, responsabilidad y bon ciudadania. Segun e, experiencianan manera esaki
ta evidencia e rol positivo cu institucionnan comunitario por hunga den formacion di
individuo.
Prome Minister a subraya cu e restauracion di e edificio ta representa mas cu un
renobacion fisico; e ta contribui na preservacion di identidad y historia di Aruba.
Finalmente, Prome Minister Mike Eman a confirma su compromiso pa sigui apoya e
proceso di restauracion, indicando cu esaki ta forma parti di un vision mas amplio pa
revitalisacion di Bernhardstraat y su patrimonio historico. E vision di “Bon Comun”,
promovi pa Prome Minister, ta pone comunidad na centro di desaroyo. Cu
establecimento di Stichting Revitalization Bernhardstraat, e vision aki a bira accion
concreto, enfoca riba cooperacion, renovacion y fortalecemento di comunidad.
Den e mesun linea, varios iniciativa di embeyecimento a wordo realisa den e area,
incluyendo pintura di edifisionan y casnan. Ademas, un mural na honor di e musico
Arubiano Julio Bernardo Euson, inaugura na edifisio Chocolate City na San Nicolas,
reconociendo su contribucion cultural y trayectoria internacional.
E discurso a conclui cu un mensahe di union, compromiso y respet pa historia y
identidad di Aruba.
Colocacion di Monumentenzegel
Durante e ceremonia, a tuma luga un momento simbolico importante: e colocacion
oficial di e monumentenzegel na Bernhardstraat 203. Prome Minister Mike Eman, hunto
cu Pastor Virgil Sams y Raul Gei, a participa den e acto ceremonial.
E momento a marca e reconocimiento oficial di e edificio como monumento, resaltando
su balor historico, cultural y pa comunidad. Cu presencia di comunidad y autoridadnan,
e acto a wordo recibi cu aprecio, simbolisando inicio di un etapa nobo pa preservacion
di e sitio.
Firma di overeenkomst
Un otro momento significativo durante e ceremonia tabata e firma oficial di e acuerdo di
restauracion. Prome Minister Mike Eman, hunto cu Pastor Calix Ashby y Raul Gei, a
firma e acuerdo, marcando e compromiso entre e diferente partinan pa e proseso di
restauracion.
Entrega simbolico
Como clausura di e ceremonia, a entrega un buki na Prome Minister Mike Eman titula
The Great Controversy. E gesto a simbolisa un invitacion pa reflexion personal, dentro
di e contexto di e actividad conmemorativo.
2000