Ta importante pa para keto y analisa con e prome 6 lunanan di 2022 a bay pa turismo di Aruba.
Bishitantenan
Den e prome 6 lunanan di 2019, Aruba a ricibi 575,649 bishitante “stayover”, mientras cu den e prome 6 lunanan di 2022, Aruba a ricibi 528,325 bishitante “stayover”. Si compara e cifranan por wak cu ya caba Aruba a yega un recuperacion di 92%. Si compara kwartaal 1 di 2022 cu kwartaal 1 di 2019, por conclui cu den 2022 a mira un bahada di 21% como consecuencia di Covid, e variante di Omicron. Pa kwartaal 2, 2022 a crece cu 5% compara cu e mesun periodo na 2019, den linea cu recuperacion fuerte di nos turismo.
Tipo di acomodacion
Den e prome 6 lunanan di 2019, 244,970 bishitante a keda den High Rise hotels, cu ta 42.6% di bishitante, mientras cu den e prome 6 lunanan di 2022, 187,085 bishitante a keda den High Rise hotels, cu ta 35.4%.
Den e prome 6 lunanan di 2019, 50,006 bishitante a keda den Low Rise hotels, cu ta 8.7% di bishitante, mientras cu den e prome 6 lunanan di 2022, 51,603 bishitante a keda den Low Rise hotels, cu ta 9.8%.
Den e prome 6 lunanan di 2019, 152,254 bishitante a keda den Timeshare, cu ta 26.4% di bishitante, mientras cu den e prome 6 lunanan di 2022, 155,792 bishitante a keda den Timeshare, cu ta 29.5%.
Den e prome 6 lunanan di 2019, 128,419 bishitante a keda den otro tipo di acomodacion, cu ta 22.3% di bishitante, mientras cu den e prome 6 lunanan di 2022, 133,845 bishitante a keda den otro tipo di acomodacion, cu ta 25.3%. Por deduci cu pa 2022 e categorianan di Low Rise hotels, Timeshare y otro acomodacion a mira un crecemento den representacion compara cu e promer mitar di 2019.
Edad
Pa loke ta trata edad di nos bishitantenan den e prome 6 lunanan di 2022, tawata tin un disminucion di bishitante di mayoria edad compara cu 2019. E unico gruponan cu a crece ta e grupo di 20-29 cu un crecemento di 5.5% y e grupo di 30-39 cu un crecemento di 4%. Por lo general pues ta mira un crecemento den generacionnan mas hoben; Gen Z y Millenials.
Mercado y Aerolinea
Si compara e diferente mercadonan por nota cu na 2019, 80.6% bishitante den e prome 6 lunanan tawata procedente di Norte America. Na 2022 e cifra aki ta 83.3%. E aerolinea cu a trece mas bishitante pa Aruba for di e mercado aki na 2022 ta Jetblue, cu un crecemento di 19.4% den comparacion cu 2019.
Den e prome 6 lunanan di 2022, 7.6% di bishitante tawata procedente di Europa. Den e mesun periodo aki di 2019 esaki tawata 7.5%. E aerolinea cu a trece mas bishitante pa Aruba for di e mercado aki na 2022 ta KLM, cu un crecemento di 32.2% den comparacion cu 2019.
E mercado di Sur America tawata responsable pa 9.6% di e bishitantenan den e prome 6 lunanan di 2019. Durante e prome 6 lunanan di 2022 esaki a bira 6.8%. E aerolinea cu a trece mas bishitante pa Aruba for di e mercado aki na 2022 ta Avianca, cu un reduccion di 42.5% den comparacion cu 2019.
Por lo general por mira cu Merca ta gana tereno den representación di unda hende ta bishita, Europa ta keda stabil y Latino America a inicia su recuperacion mas despues y por nota esaki den % di representación. Tur esaki ora compara prome mita di 2022 versus 2019.
A.T.A. lo sigui cu esfuersonan di recuperacion y ta wak dilanti na e 6 lunanan cu falta di 2022 cu hopi determinacion y entusiasmo.