Fundashon Birgen di Rosario no tin derecho riba supsidio adishonal a pesar di a komprometé
su mes pa ku esaki. Minister mester aklará mas detayadamente e deskuento riba supsidio
regular.
Fundashon Birgen di Rosario, ku ta ofresé kuido médiko i aktividatnan na hende mayor di edat,
a pidi Minister di Desaroyo Sosial, Labor i Bienestar (SOAW) un supsidio di un montante di NAf
9.862.700,- pa aña 2020. E montante aki ta konsistí di un supsidio regular i un supsidio adishonal.
E petishon pa un supsidio adishonal ta basá riba un palabrashon entre e minister i e fundashon.
E minister a rechasá e petishon pa un supsidio adishonal pa e fundashon. E minister a otorgá e
supsidio regular, pero un montante mas abou ku loke e fundashon a pidi i ku semper bai a ser
pagá den pasado. Den e prosedura aki e fundashon ta hasi un apelashon riba e prinsipio di
konfiansa. Ta asina ku e minister a skibi un karta na e fundashon den kua e ta menshoná ku e tin
derecho riba un supsidio adishonal pa aña 2020. Korte ta evaluá e apelashon riba e prinsipio di
konfiansa a base di algun paso. E prome paso ta e pregunta si tabata tin kuestion di un
kompromiso di parti di e minister. Den e kuadro ei ta relevante si e fundashon mester tabata
konsiente ku e minister no tabata outorisá pa kompromete su mes. A base di artíkulo 10 di e
Landsverordening ku ta regardá reglanan di kontabilidat ta e minister di Finansa mester a duna
su opinion tokante di e kompromiso en kuestion i esei no a sosodé. Kòrsou ta un komunidat
chikitu. Relashonnan personal ta hunga un ròl grandi i un rechaso eksplísito no ta ser duná
fasilmente. P’esei ta importante ku reglanan tokante outorisashon i tumamentu di desishonnan
formal mester ser apliká estriktamente. Den e konteksto aki, ta ferwagt ku un persona konserní
na Kòrsou konosé e reglanan legal òf ta hasi investigashon tokante esaki, sigur ora ta trata
reglanan legal tokante eventual kompromisonan. Di e fundashon no por spera e investigashon
aki. E karta den kua e minister a komprometé su mes tin e siguiente frase: “ ku despues di
konsiderashon interno nos a yega na e desishon pa tòg duna Fund. Birgen di Rosario un supsidio
adishonal (…)”. E fundashon por a asumí ku e minister a kordiná e promesa ku e minister di
Finansa. Tòg e apelashon di e fundashon riba prinsipio di konfiansa no a logra e meta desea pa e
fundashon. E siguiente paso ta e pregunta si tin otro interesnan ku ta pisa mas ku e interes di e
fundashon kaminda ekspektativanan hustu a ser duná. Despues ku e minister a kompromete su
mes ku e fundashon a sera akuerdonan ku Hulanda tokante sosten di likides. Tambe e situashon
finansiero di pais komo konsekuensia di e pandemia COVID a empeorá. Den e kaso aki e interes
general pa trese i mantené òrdu di e finansas di gobièrnu ta pisa mas ku e interes di e fundashon.
Sí ta asina ku e minister mester bolbe konsidera e supsidio regular ku a ser pidí. Ta parse ku e
montante mas abou ku e minister a otorgá komo supsidio regular ta basá riba un deskuento di e
tarifa pa kliente. E minister mester duna un splikashon mas detayá dikon e a otorgá un supsidio
regular mas abou di loke a ser pidí dor di e fundashon.
Fundashon Birgen di Rosario no tin derecho riba supsidio adishonal
