Hose Figaroa (FTA): Aruba tin mester di un plan di migracion integral

Presidente di e sindicato FTA, Hose “Jomar” Figaroa, a haci un yamada na Gobierno di Aruba pa stop di pensa unicamente riba e prome grupo di legalisacion y pa cuminsa actua de forma proactivo. Segun Figaroa, e pais tin mester urgente di un Plan di Migracion Integral pa por maneha e fluho di trahado cu lo bin den futuro, specialmente cu e desaroyo hotelero y economico cu ta biniendo na caminda.
For di un ‘Plan di Admision’ pa un ‘Plan di Migracion’
Figaroa a splica cu pa hopi aña Aruba tabata tin un “plan di admision”cual ta stipula unicamente e exigencianan pa admiti un persona riba e isla. Sinembargo, e lider sindical ta insisti cu e vision ey ta keda cortico pasobra e proceso no ta caba ora e persona presenta su papelnan.
Aruba tin mester di un plan integral di migracion completo. Pasobra unabes un trahado drenta, bo mester tin un contesta structural: Con bo ta bay percura pa nan tin un luga di biba? Con ta bay structura nan transporte? Con ta bay maneha nan gastonan medico? Tur esakinan tin un impacto directo riba nos economia,” Figaroa a duna di conoce.
E sindicato ta recorda cu, mirando e cantidad di hotelnan cu lo wordo lanta, e sector comercial no tin otro opcion cu importa trahadonan migrante pa yena e vacantenan aki y sostene e economia di e pais. Pa e rason aki, e criterio y exigencianan mester ta pre-defini di un forma proactivo.
No por ripiti e erornan di e añanan ’80 y ’90
Figaroa a hance un advertencia serio, recordando cu Aruba a pasa caba den un situacion similar na final di e añanan 1980 y 1990. Segun e lider sindical, “aparentemente nos no a siña di nos erornan”. El a splica cu den e epoca ey, e falta di un maneho structural a hiba e pais na un overschot (exceso) riba e mercado laboral despues cu a importa hende di mas pa yena un necesidad temporal.
Nos sa masha bon cu e baca ta den hoga, pasobra e permisonan di hotel cu a wordo duna tabata sa caba cu, e camaranan ey lo wordo traha y cu lo mester di hende pa traha eynan. Nos sa via estadistica cu nos poblacion ta envehesiendo y cu nos mester di hende pa yena e funcionnan ey. Nos no por warda te na ultimo momento, pasobra sopi pura ta sali salo,” el a reitera.
Concepto riba mesa y e aporte di FTA
Apesar di e criticanan pa e tardansa structural di e plan aki cual mester a wordo implementa añanas pasa,Figaroa a confirma cu e sindicato a ricibi un invitacion recientemente for di Gobierno pa evalua un concepto di un maneho nobo.
E sindicato FTA, siendo e organisacion sindical mas grandi den e sector di hotelaria y comercio, lo participa activamente den e reunionnan aki pa duna nan conseho y aporta na e e maneho di migracion laboral. E meta principal ta pa percura cu e trahadonan migrante cu drenta, haci esaki den un cuadro legal, y cu tur e condicionnan social mester pa e economia di Aruba por sigui draai di un forma corecto y sostenibel.