Durante un bishita di trabou resien na Den Haag, diputado Anjelica Cicilia, na nòmber di Entidat Públiko Boneiru a hiba algun kòmbersashon importante tokante progreso di e Plan di Maneho pa Naturalesa i Medio Ambiente (Natuur- en Milieubeleidsplan – NMBP) i tokante siguridat di kuminda. No opstante e insiguridat polítiko aktual despues di kaida di gabinete hulandes, Reino a mustra su mes dispuesto pa traha huntu riba e temanan krusial akí.
Na Den Haag diputado Cicilia a papia ku entre otro sekretario di estado Jean Rummenie di Ministerio di Agrikultura, Piskamentu, Siguridat di Kuminda i Naturalesa (LVVN), i e direktor general di Naturalesa i Piskamentu, señor Mark Roskam Abbing. E kòmbersashonnan a enfoká partikularmente riba importansia di un kontinuashon duradero di e metanan stratégiko di e Plan di Maneho pa Naturalesa i Medio Ambiente. Un punta di lansa importante ta mehorashon di maneho i prosesamentu di shushi, ku komo meta final seramentu di e sitio di depositá shushi na Lagun na aña 2030.
E Ministerio di Asuntunan Interno i Relashonnan den Reino (BZK) tin intenshon pa via ‘Nationaal Groeifonds’ pone 24 mion euro disponibel pa e seis islanan karibense. Ta trahando riba lantamentu di un fondo rotatorio, ku kua empresarionan na e islanan por haña finansiamentu kontra un interes hopi abou. Esaki tin ku fortifiká ekonomia lokal i kontribuí na desaroyo duradero di e islanan. Segun diputado Cicilia, elaborashon mas aleu di e fondonan ku ta disponibel ta di gran importansia pa yega na un aserkamentu dirigí i efektivo ku realmente ta fomentá produkshon lokal di kuminda. ‘Ta krusial ku huntu ku Reino nos ta wak kua ta e intrumentonan ku ta funshoná mas mihó pa e sirkunstansianan spesífiko na e islanan, di manera ku nos por traha pa logra mas siguridat di kuminda i ménos dependensia di importashon’, segun Cicilia.
Diputado Cicilia ta enfatisá ku banda di medionan finansiero, ekspertisio i ampliashon di kapasidat tambe ta esensial: ‘Boneiru ta enfrentando desafionan grandi riba tereno di medio ambiente i sostenibilidat. Solamente den kolaborashon estrecho ku Reino nos por atendé ku e desafionan akí. E kòmbersashonnan na Den Haag ta mustra ku tin disponibilidat pa traha huntu.’
Den luna di mei Kolegio Ehekutivo a entregá un petishon klarito pa ayudo na Reino. Hasiendo esaki, un biaha mas Kolegio Ehekutivo a suprayá ku solushonnan duradero pa maneho di shushi ta solamente posibel pa medio di esfuersonan konhunto di vários ministerio.
