Ora nos tuma nota di e kontenido di e raport di ARC nos por konkluí ku maneho finansiero di
nos pais ta den un desórden total.
Ta espantoso tuma nota di e kantidat di fondonan públiko ku gobièrnu no por duna kuenta
i rason riba dje pa loke ta gastunan ku gobièrnu ta hasi, i tambe ku entradanan ku no ta
mustra e posishon finansiero di país manera minister di finansa engañosamente a bin ta
gaba su mes p’e.
E trayekto pa yega na un kuenta anual akordá dor di ARC ku a kuminsa bou di gobièrnu
anterior a konose un retraso formal. Kiermen e trayekto ku ta hiba pa drecha
atministrashon finansiero di nos pais no a siguí ku mesun speed bou di gobirnu aktual. Esaki
ta keda indiká dor di ARC i tambe gobièrnu Pisas den su reakshon ta konfirmá esaki.
Pa MAN/PIN drecha nos atministrashon i maneho finansiero ta importante. Pero loke mas ta
preokupá nos ta ku e realidat finansiero di nos pais ta hopi otro for di loke Gobièrnu i
minister di finansa a laga aparentá den komunikdat.
Ademas ora nos tuma nota di e último reakshon di Kolegio di Supervishon Finansiero(Cft.)
riba presupuesto di gobièrnu, kaminda ta Cft. ta pone un últimatum pa gobièrnu pa adaptá
presupuesto 2024 na e realidat finansiero di pais i tambe pa kubri riesgonan ku pais ta kore
den e presupuesto, e ta mustra klaramente ku minister Silvania no tin finansa di e pais aki
bou di kòntròl.
Mas tristu ta ku ta bin aserká e eksonerashon di mas ku 3 bion di debe di impuesto
aparentemente pa komplase algún finansiado di kampaña. Esaki kompaña pa un falta di
rèspèt di minister di finansa pa bin parlamento te 19 di ougùstùs proksímo pa kontinuá ku e
reunion di 11 di mei 2023 pa kontesta pregunta riba e anulashon di 3000 mion di impuesto,
kaminda nos pueblo tin tur sorto di nesesidat. Parlamento mester warda mas ku 1 aña pa
haña klaridat di minister riba un desishon ku minister a tuma.
Ora mira reakshon di MFK kual despues di mas ku 3 aña di gobernashon, ta remarkabel ku
nan kier tira falta ketu bai riba otro gobièrnu. Di e forma ei nan ta mustra kon un biaha mas
kier skonde pa nan aktonan embes di asumí nan propio responsabilidat.
Ku e argumento ku ultimo 10 aña ta otronan a goberná nos mester refreská nan memoria ku
den e último 10 aña, tantu MFK i su partner di koalishon a partisipá den gobernashon 2010
pa 2012. MFK tabata enkargá ku finansa di e pais aki ku a hiba na un instrukshon dor di
Hulanda na na gobièrnu.
Kiermen basta di buska argumento fofo pa kulpa otronan i asumí responsabilidat pa
maneho di aña 2022 kual tabata kompletamente bou di MFK su gobernashon.
AKSHON DI MINISTER di FINANSA
Riba medio sosial nos a mira Minister ta indiká ta bai saka un karta pa ARC hala aden e
rapòrt riba kuenta anual 2022. E akshon aki ta mustra ku minister no ta kompronde nos
estado di derecho i no tin rèspèt pa nos órgano estatal. Ta mesun MFK a bin ku proposishon
di lei pa fortifiká e funshonamentu di ARC kual a keda aprobá dor di parlamento.
ARC ta un organo independiente ku ta raportá na Parlamento. Nos frakshon den Parlamento
a manda karta ku pregunta na Minister Presidente riba e akto di e minister aki. Minister
Presidente komo kabes di gobièrnu i pa maneho responsabal pa ARC mester asumí su
responsabilidat i para e aktonan kontra demokrasia i salbaguardia funshonamentu
independiente di instituto manera ARC.