Dia Mundial di Telecomunicacion y di Sociedad di Informacion tin como obhetivo concientisacion riba e posibilidadnan cu e uso di Internet y otro tecnologia di informacion y comunicacion (ICTs) por ofrece sociedadnan y economia y tambe pa promove inclusion digital.
Desde 1969 ta celebra Dia Mundial di Telecomunicacion riba 17 di mei pa marca e creacion di International Telecommunication Union y pa conmemora e firmamento di e promer Convenio Telegrafico Internacional na 1865.
Na november 2005, e Cumbre Mundial riba Sociedad di Informacion (WSIS- World Summit on the Information Society) a pidi Asamblea General di Nacionan Uni pa declara 17 di mei como Dia Mundial di Sociedad di Informacion pa yama e atencion riba e importancia di tecnologianan di informacion y comunicacion (ICTs) y e numeroso temanan relaciona cu e sociedad di informacion plantea pa WSIS.
E Asamblea General na maart di 2006 a adopta un Resolucion stipulando cu Dia Mundial di Sociedad di Informacion lo ser conmemora riba 17 mei..
Na november di 2006, den un conferencia di ITU na Turkia a dicidi pa combina e dos celebracion den un solo Dia Mundial di Telecomunicacion y Sociedad di Informacion riba 17 di mei.
TEMA 2026: LINEA DI BIDA DIGITAL PA UN MUNDO CONECTA Y RESILIENTE
Den un mundo cu cada bes mas ta depende di un conectividad ininterrumpi, e resiliencia di nos rednan digital ta resulta di ta esencial. E infrastructuranan digital clave, red terrestre, kabel submarino, satelite y sistema di dato, ta constitui e columna vertebral y sistema nervioso di tur comunidad y economia na mundo.
Riba Dia Mundial di Telecomunicacion y Sociedad di Informacion (WTISD) 2026 nos ta urgi tur gobierno, industria y comunidad pa fortalece e infrastructuranan vital aki cu ta mantene mundo funcionando.
Den un mundo na unda kabel submarino por ser corta, red terreste, satelite y sistema di dato ta vulnerabel pa atake cibernetico, disrupcion di coriente of destruccion fisico, esaki ta rekiri un colaboracion nacional, regional y internacional pa percura cu e lineanan di bida digital ta robusto, sigur y resiliente.
MENSAHE DI SECRETARIO GENERAL DI NACIONAN UNI, ANTONIO GUTERRES
Riba Dia Mundial di Telecomunicacion y Sociedad di Informacion, e International Telecommunication Union y mundo ta reconoce tecnologia digital como linea di bida, conectando ser humano cu otro, cu servicionan digital y garantizando siguridad.
Ora desaster tuma lugar, rednan ta transmiti alerta adelanta, ta mobiliza equipo di respuesta inicial (first responders) y ta mantene establecimento medico, centronan educativo y servicionan publico den funcion.
Pero lineanan di bida digital mester ta confiabel, sigur y accesibel pa un y tur. Demasiado comunidad no ta conecta. Sistemanan critico ta vulnerabel. Desinformacion y menaza cibernetico ta aumentando.
Y cu emergencianan climatico intensificando y e division entre esnan cu no tin acceso na AI y esnan cu si tin esaki creciendo, e costo di inaccion ta cay mas duro netamente pa esnan cu ya a keda laga atras.
Nos mester inverti den conectividad – di kabel submarino, satelite, y di e acceso local na standard habri y adkiri competencia digital.
Nos mester implementa e Pacto Global Digital, avanza y promove un gobernancia pa inteligencia artificial basa riba derechonan y fortalece e cooperacion entre gobierno, sector priva y sociedad civil den tur pais.
Infrastructura digital ta un bon comun esencial y ban uni pa haci esaki resiliente enfrente di tur crisis actual y den futuro, pasobra ora e lineanan di bida digital ta universal y sigur, tur comunidad por prepara, responde y recupera.
DIA MUNDIAL DI TELECOMUNICACION Y SOCIEDAD DI INFORMACION 2026
LINEANAN DI BIDA CRUCIAL: SEMICIODUCTOR Y CENTRO DI DATA
Semiconductor (tecnologia di microchip) ta actua como e fundeshi fisico pa tur linea di bida digital, permitiendo edge computing, transmision resiliente di data y un conversion eficiente di energia, y algun tipo di semiconductor ta garantiza mantene red di comunicacion global den servicio den ora di crisis.
1. Procesador di AI y logica (CPU, GPU y NPU). Ta sirbi como “cerebro” coordinando rednan digital global y centro di data procesando cantidad enorme di data. Permitiendo operacion autonomo y capacidad di respuesta den tempo real.
2. Edge AI Chips (accelerador pa machine learning di consumo electrico abou), Ta procesa dato directamente den equiponan local (manera sensor di e Internet of Things y telefon mobil) en bes di depende di servicio cu ta permanece riba servidor remoto di cloud computing.
3. Semiconductor compuesto (GaN and SiC). Fabrica di material manera Gallium Nitride (GaN) y Silicon Carbide (SiC), e chipsnan aki ta permiti e conversion di energia di voltahe halto cu un eficiencia y maneho termico increibel.
4. Chips di memoria (DRAM y NAND Flash). Ta responsabel pa almacena y recupera coleccion di data masivo cu ta corre den rednan moderno.
5. Optoelectronico y fotonico. Ta converti señal electrico den lus pa transferencia ultrarapido di dato (por ehempel, diodo di laser y fotodetector).
Centro di data (datacenters), Den cuadro di e tema di 2026, diferente tipo di centro di data ta fungi como e curasonan palpitante pa e lineanan di bida digital, sigurando cu sistema di emergencia, mundo financiero, cuido medico y telecomunicacion por resisti crisis y recupera rapidamente.
1. Centro di data central y empresarial. Instalacionan centraliza utiliza pa corporacion tecnologico principal (p.e. OpenAi, AWS. Google y Microsoft) of institucionan grandi financiero y gubernamental. Ta funciona como repositorio central pa aplicacion global critico, plataforma di servicio di cloud computing y base di dato nacional.
2. Centro di data micro of edge. Facilidadnan localiza, mas chikito cerca di e usuasio y equiponan (na e rand di e red). Pasobra nan ta local, nan ta reduci e latencia (tempo di transmision) y ta mantene servicio funcionando, incluso si tin interrupcion den servicio di largo distancia of kabel submarino temporalmente. Nan ta fundamental pa procesa alerta di emergencia tempran, nabegacion autonomo y respuesta di telesalud den tempo real.
3. Centro di data modular y den container. Nan ta unidad escalabel y autonomo cu ta empaketa servidor, refrigeracion y equipo di energia electrico pa ser mobiliza pa uso di emergencia, zona di desaster, area di conflicto of regionan remoto pa restoracion rapido di conectividad di e red local, acceso na servicio financiero of otro servicio ora infrastructura permanente ta fayando.
4. Centro di data espacial. Esaki ta forma un Infrastructura di proximo generacion poni den orbita terrestre abou (LEO), diseña pa maneha procesamento y enrutamento di dato den espacio. Como parti di e rednan integra espacio-aire-tera (SAGIN) mas amplio, e centronan di dato aki den orbita ta proporciona respaldo y retransmision esencial ora rednan electrico terrestre of sistemanan di dato a keda destrui pa desasternan natural extremo (p.e. megatemblor of inundacion).
5. Centro di data na altitud halto, berde of flotante of sumergi den laman. Esakinan ta sea localiza den zonanan di altitud of clima frieu of utilizando frecuentemente solamente energia renovabel.
