Mientras FMSA ta recurri na e spotmarket pa cumpra gasolin, diesel y jetfuel , un metodo cu normalmente ta resulta den prijs mas halto , parlamentario di MEP a entrega awe un keho oficial na Ministerio Publico riba loke nan ta describi como un scandal den maneho di suministro di combustibel di Aruba.
Parlamentario Endy Croes a expresa su preocupacion serio riba e situacion actual, indicando cu e manera cu FMSA ta operando no ta den beneficio di e pais. Segun croes, no tin un contracto di largo plaso, FMSA ta obliga pa cumpra combustibel den “spotmarket”, loke ta implica cu Aruba ta paga prijs diario cu por fluctua y cu normalmente ta mas caro cu un contracto structural.
“Tur compra cu FMSA ta haci awe lo tin un impacto directo riba e costo di bida di nos pueblo,” a declara Croes, agregando cu consumidornan lo termina paga e diferencia pa un sistema cu, segun croes , a wordo mal maneha.
Croes tambe a critica e falta di transparencia for di Ministerio di husticia y Economia, lidera pa minister Arthur Dowers. Segun croes, desde mas cu un luna el a entrega mas cu 31 pregunta oficial, y riba 19 di december a agrega 5 pregunta mas, sin cu haya ni un solo respuesta. Durante e mes dia nan tambe a puntra repetidamente den Parlamento riba e posicion di e compania Trafigura, e compania cu, segun croes, a gana e bidding oficial, pero cu e proceso a wordo kibra. Minister Dowers no a responde ningun di e pregunta nan, ni por escrito ni verbalmente den Parlamento.
E fraccion di MEP tambe a solicita un reunion cu presidente di Parlamento, Marlon Sneek, pa comision di experto di FMSA, RDA y e minister concerni pa crea claridad riba e proceso. Sinembargo, Croes a expresa cu e presidente di Parlamento no a facilita e reunion y, segun su evaluacion, no ta eherce su rol como un presidente independiente di e legislativo.
Debido na e falta di cooperacion y transparencia, fraccion di MEP a compila un dossier amplio cu tur corespondencia, documentonan y anexo relevante, y awe a entrega esaki oficialmente na Ministerio Público como un keho formal. Un copia di e dossier lo wordo entrega tambe na Gobernador y na VNO pa mantene nan informa.
MEP ta pidi cu Ministerio Público inicia un “orienterend onderzoek” pa evalua si a cometi iregularidad nan den e proceso di contradiccion y suministro di combustibel.
Segun Croes, e situacion den FMSA y RDA ta forma parti di un scandal mas amplio cu no solamente a pasa, pero cu ta sigui desaroyando, y cu na final di dia ta e pueblo di Aruba lo paga e costo economico y institucional di e mal maneho aki.