Mester tuma desishon pa apertura di refineria

Investigashon no por stroba

Frakshon di MAN a pone bon kla den reunion di parlamento ku pone negosashon ‘on hold’ ta nifika ku e proseso ta para ketu i ku no tin klaridat ki dia lo tin operashon di nos refineria. 

Den un moshon ku MAN a firma i entrega nos a pone bon kla pa gobierno keda duna informashon di forma regular na pueblo i parlamento i tambe pa loke ta CPR pa investiga e posibilidat pa eleminá e asuntu di preferred bidder i esklubidat di negosashon i  pa asina por medio un proseso rapido buska un operador kual ta integro i tin e potensial pa opera nos refineria. 

Banda di esaki tambe e empleadonan di CRU/RdK nan kontrato ta bai vense i nos ta desea pa esakinan keda prolonga na un manera responsabel pa asina nan mantene nan kupo di trabou i entrada. 

E proseso di refineria pa nos ta serio i importante pa desaroyo ekonomiko di nos pais. RDK su direktor mes a indika ku di 3 strike CPR ta out i awor ku tin 2 keho di banko sentral, keho di RdK mes i keho di suidadonan di nos komunidat ta indikashon fuerte ku pa RdK, CPR ta “out”.

Minister Presidente a deklará den parlamento di a duna RdK i Curoil òrdu pa bai hasi negoshi i klaramente pa hasi esaki mester kita asuntu di preferred bidder i esklusividat òf paro di negosashon pa asina ku RdK i Curoil por bai hasi negoshi manera Minister Presidente a duna òrdu. 

Kon serio e asuntu aki ta pa e Gabinete Pisas 2 ku awe despues di mas di 1 siman ku RdK a entregá keho, ainda no tin un desishon kon e proseso ta bai sigui.

Lamentabel kon frakshon di  MFK a bai kontra pa duna informashon na pueblo kada 2 luna i tambe kontra pa prolonga kontrato di e trahadonan di CRU/RdK i ta di akuerdo pa e proseso para te na momento ku investigashon ta kla.

Ku otro palabra partido MFK i frakshon di MFK ta di akuerdo pa pone e trahado i desaroyo ekonomiko di Kòrsou “ON HOLD”. TRISTU!