Turismo di Aruba ta pasando den e mihor momentonan di su recuperacion. Minister di Turismo y Salud Publico sr. Dangui Oduber ta sumamamente contento y satisfecho cu e resultadonan di luna di mei 2022. Recientemente AHATA a publica su cifranan tocante e prestacion di e hotelnan y Minister Oduber tin e placer di por comparti esakinan cu pueblo. E cifranan aki ta ilustra e comparacion entre mei di 2019 y mei 2022. E cifranan cu a ser ricibi pa cu luna di mei 2022 ta mustra hopi bon.
Manera ta conoci e maneho di Minister Oduber ta dirgi riba turistanan di calidad y turistanan cu ta gana mas di 150 mil dollar pa aña, turistanan cu ta laga hopi placa atras den nos economia.
Den luna di mei 2022 e grado di occupacion a subi cu 40% porciento compara cu mei 2021. Si compara esaki cu e grado di ocupacion di aña 2019 cu ta un aña record pa Aruba su turismo, e ta solamente 3% menos. Segun e mandatario ta importante pa remarca cu Aruba ta e di 2 pais na mundo cu a recupera su turismo di e forma aki.
Banda di e grado di occupacion e REV PAR den luna di mei 2022 a conoce un crecemento di 57.4% den compracion cu luna di mei 2021 y cresemento di 12.7% den comparacion cu mei 2019. E REV PAR den mei 2022 tabata $205.61 cu ta un cifra impresionante. E REV PAR ta un indicador sumamente imporatante pa midi e calidad di turistanan cu ta bin Aruba. E REV PAR ta e prijs cu un turista ta dispuesto pa paga pa un camber pa anochi. Nos como pais mester ta contento cu e hecho cu nos tin un di e REV PAR mas halto den Caribe. Na momento cu bo tin un REV PAR asina halto e ta bisto cu turistanan di calidad ta yegando nos pais.
Otro indicador hopi importante ta e ADR (average daily rate) cu tambe a conoce un aumento di 16.4%. E average daily rate den luna di mei 2022 ta $262.20 den comparacion cu mei 2019 cu esaki tabata na $225.21.
Turismo ta keda e driver principal di nos economia, resultadonan di luna di mei ta confirma cu recuperacion di Aruba su Turismo ta riba e bon caminda. Maneho di Minister Dangui Oduber ta dunando e resultado conforme e vision di atrae turistanan di calidad y esaki a wordo confirma cu cifranan di AHATA. Esaki sigur ta un noticia hopi positivo. Finalmente e mandatario a gradici tur empleadonan y tur partnernan den sector turistico pa cu e resultado bunita aki.