PoliticaFeatured

Minister Dowers a ricibi rapport di investigacion relaciona cu situacion na edificio di DIMAS

Minister Dowers A Ricibi Rapport Di Investigacion Relaciona Cu Situacion Na Edificio Di Dimas

Recientemente, Minister di Husticia, mr. drs. Arthur Dowers, responsabel pa e maneho di admision di stranhero, a ricibi e rapport cu resultado di e investigacion haci den edificio di DIMAS, despues di e situacion cu a presenta algun siman pasa relaciona cu holo y posibel presencia di schimmel.

E investigacion a inicia despues cu varios empleado a bira malo riba mesun dia durante oranan di trabao despues cu a haya un holor fuerte di gas. Mirando e seriedad di e situacion y pa garantisa bienestar y siguridad tanto di empleadonan como clientenan di DIMAS, autoridad a dicidi pa evacua e edificio inmediatamente, pendiente un investigacion mas amplio.

Durante e dianan cu a sigui, Departamento di Salud Publico y e compania PURE Indoor Air Quality Solutions, a realisa diferente test y inspeccion den tur piso di e edificio. Entre otro, a tuma muestra pa determina posibel presencia di schimmel, a midi calidad di aire y a haci inspeccion tecnico di e sistema central di airco.

E rapport entrega na Minister Dowers ta indica cu e resultadonan di e investigacion ta cay denter di normanan normal. Esaki ta significa cu, basa riba e resultadonan, no tin indicacion cu ta existi un situacion cu ta representa un riesgo pa e empleadonan cu ta traha den e edificio ni pa e clientenan cu ta bishita DIMAS.
Minister Dowers a indica cu e resultado ta importante pa por duna tanto personal como publico e trankilidad necesario. Na mes momento, e mandatario a enfatisa cu e recomendacionnan inclui den e rapport lo haya e atencion necesario.

E rapport ta inclui algun recomendacion pa mehora ventilacion y circulacion di aire den e edificio. Minister Dowers a indica cu esakinan mester atencion, specialmente mirando cu varios edificio di Gobierno tin sistemanan cu ya tin varios aña den uzo y cu gradualmente mester modernisa pa sistemanan mas moderno y eficiente.

Related posts

FADA ta y lo sigui traha duro pa informa y educa riba fenomeno di Space Cake rond di scolnan

EA News Author

Ceramento di caminda en conexion cu trabou di mantencion

EA News Author

Foundation Innovation Campus for Education Aruba (FICEA) ta forma aliansa strategico cu ISAonline

EA News Author

Leave a Comment

Whatsapp Message