Minister di Husticia, Integracion, Transporte Publico y Energia, mr. drs. Arthur Dowers, a reuni cu directiva di Departamento di Integracion, Maneho y Admision di Stranhero (DIMAS) pa haya un actualisacion completo relaciona cu e situacion cu a surgi den e edificio unda tanto DIMAS como Departamento di Labor (DAO) ta ubica.
Durante e ultimo dianan a registra diferente incidente relaciona cu preocupacionnan tocante e ambiente di trabao den e edificio. E siman aki a cuminsa cu varios empleado di DAO cu a bira malo na trabao, resultando den un evacuacion preventivo di e edificio pa por haci mas test y evaluacion. Diamars mainta atrobe a surgi un situacion cu un holor fuerte y desagradabel den e piso abao, causando cu trahadonan cu ta atende publico a sali temporalmente for di e edificio.
Segun e raport preliminar Directie Volksgezondheid, basa riba e resultadonan ricibi di e diferente pruebanan, tur a resulta denter di e normanan aceptabel y no ta indica ningun situacion cu ta representa un peliger inmediato pa salud publico of di e empleadonan of clientenan.
Sinembargo, Minister Dowers ta compronde cu e preocupacionnan expresa door di empleadonan ta legitimo y merece atencion serio. Siguridad y bienestar di empleadonan y clientenan ta keda prioridad pa directiva di DIMAS y Minister Dowers.
Durante e reunion, Minister Dowers a ricibi un briefing completo tocante e resultadonan preliminar, e investigacionnan cu ta haciendo y e siguiente pasonan cu DIMAS ta tuma pa garantisa un ambiente di trabao sigur.
Minister Dowers a enfatisa cu ta evaluando diferente scenario pa limita cualkier efecto riba e productividad di DIMAS y garantisa cu e publico ta sigui haya e servicionan necesario.
