Minister Glenbert Croes a reuni cu e grupo di fondo di pensioen pa e sector turistico

“Mi kier a duna compliment na e fondo di pensioen di sector turistico, cu a crea un bon nomber door di e maneho responsabel cu nan a hiba pa loke ta e contribucion di nan participantenan cu nan fondo di pensioen.”

Minister di Labor Glenbert Croes, a reuni diahuebs ultimo cu e grupo di fondo di pensioen pa e sector turistico pa brinda nan e oportunidad di amplia e posibilidadnan di haya mas cliente.

Minister Croes a splica cu e fondo di pensioen aki ta uno di bon renombre cu lo por ta mas activo.

Nos a reuni cu e representantenan, como gobierno, pa brinda nan e oportunidad pa nan por amplia nan posibilidadnan di por haya mas cliente. 

Si amplia nan alcance, di e forma ey nan lo por brinda e trahadornan cu ta miembro di e fondo aki, mihor perspectiva pa cu acumulacion di pensioen, plannan di spaar etc. Manera nan ta bisa, yuda e empleado ‘traha dam warda awa’.  Esaki lo yuda esnan na momento cu toca nan pa haya nan pensioen, cu nan lo hay’e den bon forma. 

Proximamente Minister Croes lo ta presentando e plan cu el a ricibi durante e reunion, na Conseho di Minister pa hunto yega na e opcion cu na final ta na beneficio di e trahado miembro di e fondo di pensioen.