Ministerio di Asuntunan Interno i Relashonnan den Reino (BZK) ta establesé dos kátedra
(puesto di profesor) nobo pa Reino. Ta bin un kátedra politikologia/derecho atministrativo i
un kátedra antropologia/sosiologia.
A selektá Universidat di Leiden i Koninklijke Nederlandse Akademie van Wetenschappen
(KNAW), Koninklijk Instituut voor Taal-, Land- en Volkenkunde (KITLV), den kolaborashon ku
Universidat di Amsterdam (UvA), komo sitionan di establesimentu di e kátedranan.
Universiteit Leiden lo okupá e kátedra di politikologia/derecho atministrativo i KITLV/UvA e
kátedra di antropologia/sosiologia.
Titularnan di e kátedranan
E Kolegionan Ehekutivo di UvA i Universidat di Leiden a aprobá e proposishon pa nombra
nan kandidato. Antropólogo Sosial i Kultural dr. Francio Guadeloupe ta bira e titular di
Antropologia Públiko di Relashonnan den Reino pa KNAW/KITLV/UvA. Dr. Wouter
Veenendaal, profesor asosiá universitario di Politikologia Komparativo na instituto di Siensia
Polítiko di Universidat di Leiden, ta bira titular di Representashon Demokrátiko den Reino pa
Universidat di Leiden. Lo pon’é na disposishon di KITLV na Leiden.
Desaroyo amplio di konosementu
E dos kátedranan speshal ta un inisiativa di direktorado general Relashonnan den Reino
(DGKR) di ministerio di BZK den kuadro di desaroyo di konosementu amplio. E kátedranan ta
kontribuí na fortifikashon di e funshon di konosementu den DGKR. Tin nesesidat di atenshon
ku ta tantu profundisá komo amplia riba tereno di e ‘niche’ sientífiko Relashon di Reino ku ta
generá mas investigashon, sinergia i ‘spin-off’.
Universidatnan karibense
E esfuerso ta pa embolbí universidat- i investigadónan den e tres paisnan karibense di Reino
estrechamente den e kátedranan. Ta hasi esfuerso pa yega na un kolaborashon ku e
universidatnan karibense, unda por ehèmpel por interkambiá dosente i investigadó. Ta sigui
desaroyá e enkargo mas den konsulta ku e universidatnan karibense.
Balor enorme
Sekretario di estado Alexandra van Huffelen di Relashonnan den Reino: “Mi ta sumamente
kontentu ku a logra realisá e kolaborashon akí ku e universidatnan. Konosementu sientífiko
konfiabel ta di enorme balor i por kontribuí na sigui mehorá e kolaborashon den Reino mas.
Un bunita logro, hustamente den e aña ku nos ta selebrá ku nos den Reino ya ta 70 aña uní
pa medio di Statüt”.
Titular Francio Guadeloupe: ‘Kasi mitar di personanan ku un orígen karibense ta biba na
Hulanda. Na mes momentu tin míles di persona ta biba riba e islanan di kende nan
antepasado a nase na Hulanda. E realidat akí ta mas grandi ku e tenshonnan entre
polítikonan na Den Haag i polítikonan riba e islanan. Nos mester rekonosé ku relashonnan
den Reino den práktika tin efekto riba un frekuensia mas abou ku e nivel di esnan ku ta
stipulá maneho. Ami kier enfoká riba loke ta hasi den komunidat i den polítika pa logra hasi e
Reino mas igual, hustu i inklusivo pa tur hende. Esei ta loke ami kier investigá, huntu ku e
institutonan di konosementu riba tur seis isla i na Hulanda.’
Titular Wouter Veenendaal: ‘Reino hulandes tin un struktura úniko. E ta konsistí di kuater
pais outónomo i igual, pero un di e paisnan ei – Hulanda Oropeo– ta superior polítikamente i
institushonal. Esei ta lanta interogante tokante e representashon demokrátiko den Reino, ku
ami kier bai investigá den e enkargo di enseñansa akí. Huntu ku instituto- i ekspertonan riba
e seis islanan i na Hulanda mi ta spera di duna un impulso na desaroyo di konosementu i
enseñansa riba tereno di polítika i demokrasia den nos Reino. Mi ta anhelá enormemente pa
kolaborá ku sientífiko- i institutonan na ámbos banda di oséano.’
Proseso habrí
A realisá e kátedranan pa medio di un proseso habrí. A pidi e universidat- i institutonan di
konosementu pa entregá un proposishon ku propio kontenido i enfoke di investigashon. A
balorá e proposishonnan di Universidat Leiden i KITLV/KNAW/UvA komo esnan di mas mihó.
DGKR ya ta kolaborá ku Haagse Hogeschool den kuadro di e ‘minor’ Relashonnan den Reino.