Riba petishon di Minister di Hustisia, mr Shalten Hato, Konseho di Minister a bai di akuerdo pa apuntá señor mr. Andre Gosselaar komo notario. Señor Gosselaar ta un hóben di ku a nase i biba riba nos bunita isla. Señor Gosselaar tin un eksperensia amplio den notariado fungiendo komo notario-kandidato (kandidaat-notaris) i aktualmente e tin e funshon di notario suplente.
E proseso pa nombra notario ta kai bou di responsabilidat di Minister di Hustisia. E proseso ta enserá ku despues ku interesadonan solisitá, Presidente di Korte Komún di Hustisia tin e enkargo pa kanalisá e proseso di solisitut kual ta enserá entre otro skucha e interesadonan. Seguidamente, Presidente di Korte Komún di Hustisia ta hasi un proposishon na Minister di Hustisia, indikando kua kandidatonan e ta konsiderá mihó ekipá pa okupá e puesto(nan) vigente.
Basa riba lei Minister di Hustisia ta risibí un proposishon ku ta enserá un maksimo di tres (3) potensial kandidato for di kua e Minister por skohe. E proposishon no ta definitivo, pues Minister tin sierto libertat pa tuma e desishon ku e ta konsiderá mihó i e ta karga responsabilidat gubernamental pa e desishon aki.
Resientemente tabata tin un (1) puesto vakante pa notario na Kòrsou. Den kuadro di esaki Minister di Hustisia a proponé na Konseho di Minister pa nombra señor mr. Andre Gosselaar komo notario i asina yena e puesto vakante aki.